G20 Summit 2023 : પીએમ મોદી સાથે ડિનર કરશે જો બાઇડન, બંને નેતાઓ વચ્ચે આજે દ્વિપક્ષીય થશે બેઠક

Advertisment

વડાપ્રધાન નરેન્દ્ર મોદીએ અમેરિકાના રાષ્ટ્રપતિ જો બાઇડનને ડિનર માટે આમંત્રણ આપ્યું છે. રાષ્ટ્રપતિ બાઇડન જી-20 સમિટમાં સામેલ થવા ભારત આવવા રવાના થયા હતા. બંને નેતાઓ શુક્રવારે (8 સપ્ટેમ્બર) સાંજે 7.30 વાગ્યે લોક કલ્યાણ માર્ગ સ્થિત પીએમ મોદીના નિવાસસ્થાને મળશે. જો બાઇડન જી-20 સંમેલનમાં ભાગ લેવા માટે સાંજે ભારત પહોંચશે અને ત્યારબાદ પીએમ મોદી સાથે ડિનર કરશે. બંને નેતાઓ વચ્ચે આજે દ્વિપક્ષીય બેઠક પણ થવાની છે.

અમેરિકાના રાષ્ટ્રપતિ બન્યા બાદ જો બાઇડનની આ પ્રથમ ભારત મુલાકાત છે. પૂર્વ રાષ્ટ્રપતિ ડોનાલ્ડ ટ્રમ્પ વર્ષ 2020માં ભારત આવ્યા હતા. જો બાઇડન અને પીએમ મોદીનું આ બીજું સ્પેશિયલ ડિનર હશે. આના ત્રણ મહિના પહેલા વડાપ્રધાન મોદીની અમેરિકાના પ્રવાસ દરમિયાન બાઇડન તેમના માટે વ્હાઇટ હાઉસમાં ખાસ ડિનરનું આયોજન કર્યું હતું. બંને નેતાઓ વચ્ચે દ્વિપક્ષીય વાટાઘાટો દરમિયાન ભારત-યુએસ વ્યાપક વૈશ્વિક અને વ્યૂહાત્મક ભાગીદારીને વધુ મજબૂત કરવા પર ભાર મુકવામાં આવે તેવી શક્યતા છે.

બંને નેતાઓ સ્વચ્છ ઊર્જા, વેપાર, ઉચ્ચ ટેકનોલોજી, સંરક્ષણ જેવા ક્ષેત્રોમાં ચાલી રહેલા દ્વિપક્ષીય સહયોગની સમીક્ષા કરે તેવી અપેક્ષા છે. આ સાથે તેઓ વિશ્વના કેટલાક ગંભીર પડકારોનો સામનો કરવામાં બંને દેશો કેવી રીતે યોગદાન આપી શકે તે અંગે પણ ચર્ચા કરી શકે છે. એક સૂત્રએ જણાવ્યું કે વડાપ્રધાન મોદી અને રાષ્ટ્રપતિ બાઇડન વચ્ચેની વાતચીતમાં સ્વચ્છ ઉર્જા, સંરક્ષણ અને ઉચ્ચ ટેકનોલોજી સહિત વિવિધ મુખ્ય ક્ષેત્રોમાં ચાલી રહેલા દ્વિપક્ષીય સહયોગની સમીક્ષા કરવા પર ભાર મુકવામાં આવે તેવી શક્યતા છે.