કોંગ્રેસ-RJDના મંચથી અપશબ્દોનો PM મોદીએ આપ્યો ધારદાર જવાબ,કહ્યું હું તો માફ કરી દઇશ પણ ભારત નહીં કરે

વડાપ્રધાન નરેન્દ્ર મોદીએ મંગળવારે વિડીયો કોન્ફરન્સિંગ દ્વારા "બિહાર રાજ્ય જીવિકા નિધિ ઋણ સહકારી સંઘ લિમીટેડ"ના ઉદ્ઘાટન કાર્યક્રમમાં ભાગ લીધો હતો. PM મોદીએ 105 કરોડ રૂપિયાની રકમ જીવિકા નિધિમાં ટ્રાન્સફર કરી. 

PM મોદીએ કોંગ્રેસ અને RJDને આડેહાથ લેતા આકરા પ્રહાર કર્યા 

PM મોદીએ કહ્યું કે, થોડાક દિવસ પહેલા બિહારમાં જે બન્યું, તે કલ્પના પણ નહોતી કરી. રાજદ-કોંગ્રેસના મંચ પરથી મારી માતાને અપશબ્દો કહ્યા, એ માત્ર મારી માતાનું નહિ, પણ દેશની દરેક માતા-બહેન-દીદીનું અપમાન છે. તેમણે એમ પણ ઉમેર્યું કે, આ દુ:ખ હું તમારા સમક્ષ વ્યક્ત કરું છું, જેથી આપના આશીર્વાદથી હું આ સહન કરી શકું. આમારી સરકાર માટે માતાનું ગૌરવ, તેનું સન્માન, તેનું આત્મસન્માન ખૂબ જ મોટી પ્રાથમિકતા છે. માતા આપણી દુનિયા છે, માતા આપણું સ્વાભિમાન છે.

આજે એટલે કે મંગળવારે પ્રધાનમંત્રી નરેન્દ્ર મોદીએ વિડીયો કોન્ફરન્સિંગ દ્વારા બિહાર રાજ્ય જીવિકા નિધિ ક્રેડિટ કોઓપરેટિવ ફેડરેશન લિમિટેડના ઉદ્ઘાટન કાર્યક્રમમાં ભાગ લીધો હતો. વડાપ્રધાન મોદીએ કહ્યું કે, આજે મંગળવારે એક ખૂબ જ શુભ કાર્ય શરૂ થઈ રહ્યું છે. આજે, બિહારની માતાઓ અને બહેનોને એક નવી સુવિધા મળવા જઈ રહી છે - જીવિકા નિધિ ક્રેડિટ ગવર્નમેન્ટ યુનિયન. આ સાથે દરેક ગામમાં જીવિકા સાથે જોડાયેલી બહેનોને હવે પૈસા વધુ સરળતાથી મળશે. તેમને નાણાકીય મદદ મળશે.

આ સાથે તેમણે કહ્યું કે, મને ખુશી છે કે જીવિકા નિધિની સિસ્ટમ સંપૂર્ણપણે ડિજિટલ છે. હું બિહારની માતાઓ અને બહેનોને અભિનંદન આપું છું અને આ અદ્ભુત પહેલ માટે હું નીતિશ કુમાર અને બિહારની NDA સરકારને પણ અભિનંદન આપું છું તેમણે કહ્યું કે, વિકસિત ભારતનો સૌથી મોટો આધાર ભારતની સશક્ત મહિલાઓ છે.

મહિલાઓને સશક્ત બનાવવા માટે, તેમના જીવનમાંથી તમામ પ્રકારની મુશ્કેલીઓ ઓછી થાય તે ખૂબ જ મહત્વપૂર્ણ છે. તેથી અમે માતાઓ, બહેનો અને પુત્રીઓના જીવનને સરળ બનાવવા માટે ઘણી બધી બાબતો કરી રહ્યા છીએ. અમે મહિલાઓ માટે કરોડો શૌચાલય બનાવ્યા જેથી તેમને ખુલ્લામાં શૌચ કરવાની મજબૂરીમાંથી મુક્તિ મળે. અમે પ્રધાનમંત્રી આવાસ યોજના હેઠળ કોંક્રિટના ઘરો બનાવ્યા અને એ પણ ધ્યાનમાં રાખ્યું કે જો શક્ય હોય તો તે ઘરો મહિલાઓના નામે હોવા જોઈએ. જ્યારે કોઈ મહિલા ઘરની માલિક હોય છે ત્યારે તેનો અવાજ પણ વધુ વજન ધરાવે છે.