તાપી નદીના કિનારે વસેલું સુરત ટેક્સટાઇલ સીટી અને ડાયમંડ સિટીના નામથી ઓળખાય છે, ત્યારે સુરતના ડાયમંડ વેપારી દ્વારા વડાપ્રધાન નરેન્દ્ર મોદીને ભેટમાં આપવા માટે ડાયમંડ પર લેસર વડે PM મોદીનો ચહેરો કંડારવામાં આવ્યો છે.

ડાયમંડ સિટી સુરતમાં વડાપ્રધાન નરેન્દ્ર મોદીને અલગ અલગ ઉપહારો ભેટમાં આપવા માટે લોકો કઈને કંઈ નવું કરતા હોય છે. અગાઉ સુરતના એક વ્યક્તિ દ્વારા ડાયમંડથી બનેલું પોર્ટ્રેટ વડાપ્રધાન નરેન્દ્ર મોદીને ભેટમાં આપવામાં આવ્યું હતું, ત્યારે હવે સુરતના હીરાના વેપારીએ ડાયમંડ પર વડાપ્રધાન નરેન્દ્ર મોદીનું ચિત્ર બનાવ્યું છે. અમેરિકામાં વડાપ્રધાન નરેન્દ્ર મોદીને જ્યારે ગ્રીન ડાયમંડ ભેટમાં આપવામાં આવ્યો, ત્યારે સુરતના કિરણ સુથાર નામના ડાયમંડ વેપારીને વિચાર આવ્યો કે, તેને પણ વડાપ્રધાન નરેન્દ્ર મોદીને આ પ્રકારનો એક ડાયમંડ ભેટમાં આપવો છે. પરંતુ આ ડાયમંડની કિંમત કોઈપણ ન આંકી શકે તે પ્રકારે અનોખી ભેટ તે વડાપ્રધાન નરેન્દ્ર મોદીને આપશે.

ત્યારબાદ હીરા વેપારી કિરણ સુથાર, પંકજ ઢોલરીયા અને નવરસ ઢોલરીયાએ સાથે મળીને વડાપ્રધાન નરેન્દ્ર મોદીને ભેટમાં આપવા માટે ડાયમંડ પર જ PM મોદીનો ચહેરો કંડારીને ડાયમંડ તૈયાર કર્યો છે. ડાયમંડ પર વડાપ્રધાન નરેન્દ્ર મોદીનો ચહેરો લેસર વડે ક્રિએટ કરવામાં ખૂબ જ મુશ્કેલીનો સામનો કરવો પડ્યો હતો. કારણ કે, સૌપ્રથમ 40 કેરેટનો લેબગ્રોન ડાયમંડ આ કામ માટે ઉપયોગમાં લેવામાં આવ્યો હતો. પરંતુ લેસર ડ્રોઈંગ દરમિયાન 3 વખત ડાયમંડ બ્રેક થઈ ગયો હતો, અને આના જ કારણે 3 વખત ડાયમંડને પોલિસિંગ કરવો પડ્યો હતો, અને તેના જ કારણે ડાયમંડનું વજન પણ ઓછું થઈ ગયું. 40 કેરેટના લેબગ્રોન ડાયમંડમાંથી પ્રોસેસ બાદ 8 કેરેટનો ડાયમંડ તૈયાર થયો. જોકે, 3 વખત ડાયમંડ બ્રેક થયો હતો, જેને લઈને વેપારીઓને 75 હજારની નુકશાની પણ થઈ હતી. કારણ કે, એક વખત ડાયમંડને પોલિશિંગ કરવા માટે 25 હજાર જેટલો ખર્ચ થાય છે, અને આમ ત્રણ વખત આ ડાયમંડ લેસર ડ્રોઈંગ દરમિયાન બ્રેક થતા ફરી પોલિસિંગ કરવો પડ્યો હતો. તો બીજી તરફ, ડાયમંડ તૈયાર કરવા માટે 12થી 15 જેટલા રત્ન કલાકારો દ્વારા મહેનત કરવામાં આવી રહી હતી, અને 25થી 30 દિવસની મહેનત બાદ આ ડાયમંડ તૈયાર કરવામાં આવ્યો છે.