• શહેરમાં વધુ એક 23 વર્ષીય મોડેલ યુવતીનો આપઘાત

• યુવતીએ પંખે લટકી આપઘાત કરતાં પરિવાર સ્તબ્ઘ

• માનસિક તણાવમાં અંતિમ પગલું ભર્યું હોવાની આશંકા

• યુવતીએ કોઈ સુસાઇડ નોટ લખી નથી : સુરત પોલીસ

• અઠવા પોલીસ દ્વારા કરવામાં આવી રહી છે વધુ તપાસ

સુરતમાં વધુ એક 23 વર્ષની મોડેલ યુવતીના આપઘાતને લઈને ચકચાર મચી છે, ત્યારે યુવતીએ માનસિક તણાવમાં અંતિમ પગલું ભર્યું હોવાની આશંકા સાથે અઠવા પોલીસ દ્વારા વધુ તપાસ કરવામાં આવી રહી છે.

સુરતમાં કારકિર્દી નાની ઉંમરે ઘડીને પૂરપાટ દોડતી અને માત્ર 23 વર્ષની વયે મોડેલ યુવતીએ પંખે લટકી આપઘાત કરી લેતાં પરિવાર સ્તબ્ઘ થઈ ગયો હતો. મળતી માહિતી અનુસાર, શહેરના નવસારી બજાર સ્થિત કાર્તિક એપાર્ટમેન્ટમાં રહેતી 23 વર્ષીય અંજલિ અલ્પેશભાઈ વરમોરાના પરિવારમાં તેની માતા, એક ભાઈ અને એક બહેન છે. પિતા અલ્પેશભાઈ વરમોરા GEBની કોલોનીમાં કામ કરતા હતા. તેમનું અઢી વર્ષ પહેલાં એક અકસ્માતમાં મોત નીપજ્યું હતું. ત્યારબાદ પરિવારની તમામ જવાબદારી માતાએ ઉઠાવી છે. માતા પણ કામ કરીને પરિવાર ચલાવી રહ્યા છે. 2 વર્ષ પહેલાં અંજલિની સગાઈ કરવામાં આવી હતી.

અંજલિએ એક વર્ષ પહેલાં જ મોડેલિંગની દુનિયામાં પગ મુક્યો હતો. અલગ અલગ કંપનીઓ સાથે કામ કર્યા બાદ છેલ્લા થોડા મહિનાઓથી રેવન્યુ મોડેલ કાસ્ટિંગ એજન્સીમાં મોડેલિંગનું કામ કરતી હતી. સુરત અને અમદાવાદના અલગ અલગ પ્રોજેક્ટ પર તે કામ કરતી હતી, જ્યારે શૂટિંગનું કામ હોય ત્યારે જ તે જતી હતી, અને બાકીનો સમય તે ઘરે રહેતી હતી. એ જે કામ કરતી હતી, એમાં પરિવારનો સંપૂર્ણ સપોર્ટ હતો. જોકે, આપઘાતનું પગલું ભરનાર અંજલિ દ્વારા કોઈ સુસાઇડ નોટ પણ લખવામાં આવી નથી, જેને લઈને પોલીસે હવે અંજલિના મોબાઈલ ફોન પર ધ્યાન કેન્દ્રિત કર્યું છે. પ્રાથમિક રીતે માનસિક તણાવમાં પગલું ભર્યું હોવાની આશંકા સેવવામાં આવી રહી છે. જોકે, આ મામલે અઠવા પોલીસ વધુ તપાસ કરી રહી છે.