સુરત : અડાજણમાં DGVCL’ની સ્માર્ટ મીટર લગાડવાની કામગીરીનો સ્થાનિકોએ ઉગ્ર વિરોધ નોંધાવ્યો...

• શહેર તથા જિલ્લામાં સ્માર્ટ મીટર સામેનો વિરોધ યથાવત

• DGVCLના કર્મચારીઓ પહોંચ્યા હતા સ્માર્ટ મીટર લગાડવા

• હની પાર્ક રોડ પર શિવ શક્તિ એપા.ના રહીશો દ્વારા વિરોધ

• સ્થાનિકો અને DGVCL કર્મચારીઓ વચ્ચે ઉગ્ર બોલાચાલી થઈ

• મીટર અમારા છે, તે મીટર અમે બદલી નાખીશું : કર્મચારી

સુરત શહેરના અડાજણ વિસ્તારમાં શિવશક્તિ એપાર્ટમેન્ટ ખાતે DGVCL દ્વારા સ્માર્ટ મીટરની કામગીરીનો સ્થાનિકોએ ઉગ્ર વિરોધ નોંધાવ્યો હતો.

હાલ સમગ્ર ગુજરાતમાં વીજ કંપની દ્વારા સ્માર્ટ મીટર લગાડવાની ઝુંબેશ હાથ ધરવામાં આવી છે. આ અંતર્ગત, સુરત શહેરના અડાજણ વિસ્તારમાં હની પાર્ક રોડ પર આવેલ શિવશક્તિ એપાર્ટમેન્ટ ખાતે DGVCLના કર્મચારીઓ સ્માર્ટ મીટર લગાડવા માટે પહોચ્યા હતા, ત્યારે સ્થાનિક રહીશોએ વીજ કંપનીના કર્મચારીઓને મીટર લગાવતા અટકાવ્યા હતા. સોસાયટીના રહીશોએ સ્માર્ટ મીટરનો વિરોધ કરી કર્મચારીઓને કામગીરી કરતા રોક્યા હતા. તો બીજી તરફ, રહીશોના વિરોધ છતાં, વીજ કંપનીના કર્મચારીઓ મીટર લગાડવા માટે મક્કમ હતા. એક કર્મચારી સ્થાનિકોને કહ્યું હતું કે, મીટર અમારા છે, તે મીટર અમે બદલી નાખીશું, જ્યારે સ્થાનિકોએ જણાવ્યું હતું કે, સ્માર્ટ મીટર ફરજિયાત નથી, અને મકાન માલિકની પૂર્વ મંજૂરી વિના આવા મીટર લગાવી શકાય નહીં.