• તાજેતરમાં રાજ્યમાં અકસ્માતોની અનેક ઘટનાઓ સામે આવી

• વધતાં અકસ્માતોની ઘટના પર અંકુશ લાવવા પોલીસ સતર્ક

• ટ્રાફિક નિયમોનું ઉલ્લંઘન કરતાં લોકો સામે તવાઈ બોલાવાય

• પોલીસે વ્હાઈટ હેલોજન બલ્બવાવાળા 98 વાહનો જપ્ત કર્યા

• પોલીસની કાર્યવાહીના પગલે અન્ય વાહનચાલકોમાં ફફડાટ

તાજેતરમાં રાજ્યમાં અનેક કારમાં આગ લાગવાના અને વાહન અકસ્માતોની ઘટનાઓ સામે આવી છે, ત્યારે સુરત શહેરમાં પણ વધતાં અકસ્માતોની ઘટનાઓ પર અંકુશ લાવવા પોલીસ વિભાગ સતર્ક થયું છે. જેમાં પોલીસે કાર, બાઈક અને વ્હાઈટ હેલોજન બલ્બ વાપરતા વાહનચાલકો સામે તવાઈ બોલાવી હતી.

મોડીફાઇડ વાહનોના કારણે દુર્ઘટના સર્જાતા રાજ્ય સરકાર અને પોલીસ તંત્ર હરકતમાં આવ્યું છે. ખાસ કરીને વ્હાઈટ હેલોજન બલ્બ વાપરતા વાહનો અને ધ્વનિ પ્રદૂષણ કરતી બુલેટ સામે રાજ્ય સરકારના આદેશને અનુસરતા સુરત શહેર પોલીસ દ્વારા મેગા ડ્રાઇવ હાથ ધરવામાં આવી હતી. અકસ્માત અને વાહનમાં આગ જેવી ઘટનાઓ રોકવા માટે સુરત પોલીસે સમગ્ર સુરતમાંથી 98 જેટલી કાર અને બાઈક જપ્ત કરી કાર્યવાહી હાથ ધરી છે. અનેક વાહનચાલકો તેમના વાહનોમાં વ્હાઈટ હેલોજન બલ્બ સ્થાપિત કરે છે, જે માત્ર લાઈટિંગ સિસ્ટમને બદલવાનું માધ્યમ નથી. પરંતુ મોટાભાગે આગ અને ગંભીર અકસ્માતોનું કારણે બને છે.

કેટલાક કિસ્સાઓમાં આ હેલોજન બલ્બના કારણે વાહન ઝડપથી ગરમ થઈ જતાં આગ લાગવાની ઘટનાઓ બનતી હોય છે. આ ઘટના સમાજ અને વાહન વ્યવસ્થાને ગંભીર ખતરામાં મુકે છે, જેના પગલે રાજ્ય સરકાર દ્વારા હેલોજન બલ્બ પર પ્રતિબંધ ફરમાવવામાં આવ્યો છે. સરકારના આદેશ છતાં કેટલાક લોકો હેલોજન બલ્બ અને મોડીફાઇડ વાહનોનો ઉપયોગ ચાલુ રાખતા હતા. જેમાં મોટાભાગની કાર અને બુલેટ બાઇક ધ્વનિ પ્રદૂષણ અને આગ-અકસ્માતોના મુખ્ય કારણ બની રહી હતી. આવા તત્વો સામે પગલાં લેવા સુરત પોલીસ દ્વારા રાત્રિ દરમિયાન મેગા ડ્રાઇવનું આયોજન કરવામાં આવ્યું હતું. આ ડ્રાઇવમાં પોલીસ દ્વારા શહેરના વિવિધ વિસ્તારોમાં મોટાપાયે તપાસ હાથ ધરવામાં આવી હતી.