શોભિનવ સત્ય અભિનીત ફિલ્મ ‘હનુમાન અંશ’ વર્ષ 2026ની સૌથી મોટી બોક્સ-ઓફિસ સરપ્રાઈઝ સાબિત થઈ. નીમ કરોલી બાબાના જીવનની કથા રજૂ કરતી આ ભક્તિમય ડ્રામા ફિલ્મે દેશમાં રૂ. 300 કરોડ અને વિશ્વભરમાં રૂ. 400 કરોડથી વધુની કમાણી કરીને લાખો લોકોનાં દિલ જીતી લીધા છે, ત્યારે હવે, મોટા પડદા પરની સફળતા બાદ, ચાહકો નાના પડદા પર પણ નીબ કરોરી બાબાના ચમત્કારો જોઈ શકશે. આ મહાન સંતના જીવન પર આધારિત એક નવી ટેલિવિઝન શ્રેણી આવી રહી છે.
સોની ટેલિવિઝને નીબ કરોરી બાબાના જીવન, કાર્યો અને ચમત્કારોને વિગતવાર રજૂ કરવાની જવાબદારી લીધી છે. ચેનલે તેની યુટ્યુબ ચેનલ પર આગામી શ્રેણીની એક નાનકડી ઝલક પણ શેર કરી છે. આ પ્રોમોની શરૂઆત નીબ કરોરી બાબાથી થાય છે, જેઓ ધાબળામાં લપેટાયેલા મંદિર અને નદી વચ્ચેના શાંત રસ્તા પર ચાલી રહ્યા છે. દ્રશ્યોની સાથે એક વૉઇસ-ઓવર સંભળાય છે: “જે વ્યક્તિની વાર્તાઓએ દેશને મંત્રમુગ્ધ કરી દીધો, હવે તેમના જીવનની ચમત્કારિક કથાઓ ટૂંક સમયમાં સોની એન્ટરટેઈનમેન્ટ ટેલિવિઝન અને OTT પ્લેટફોર્મ સોનીલિવ (SonyLiv) પર જોવા મળશે.”
ચાહકોને પ્રોમોમાં ભગવાન હનુમાનની ઝલક પણ જોવા મળી હતી. ‘હનુમાન અંશ’ની જબરદસ્ત સફળતા બાદ નિર્માતાઓએ નીબ કરોરી બાબાના જીવન પર આધારિત આ ટેલિવિઝન શ્રેણી બનાવવાનો નિર્ણય લીધો. નોંધનીય છે કે, 7 ઓગસ્ટે સિનેમાઘરોમાં રિલીઝ થયેલી ‘હનુમાન અંશ’ નફાકારકતાની દ્રષ્ટિએ ‘ધુરંધર 2’ (Dhurdhar 2) ફિલ્મથી પણ આગળ નીકળી ગઈ છે.
વિશાલ ચતુર્વેદી દ્વારા નિર્દેશિત આ ફિલ્મે શરૂઆતના ત્રણ દિવસમાં માત્ર રૂ. 60 લાખની કમાણી કરી હતી. જોકે, ‘વર્ડ-ઓફ-માઉથ’ (લોકોની ભલામણ) પબ્લિસિટીનો તેને એટલો મોટો લાભ મળ્યો કે, તે વર્ષ 2026ની ત્રીજી સૌથી વધુ કમાણી કરનારી ફિલ્મ બની ગઈ છે. જેમાં તે માત્ર ‘ધુરંધર 2’ અને ‘બોર્ડર 2’થી પાછળ છે. નિર્માતાઓ ‘હનુમાન અંશ’ ગાથાને ત્રણ ભાગની શ્રેણી તરીકે રજૂ કરી રહ્યા છે. બીજો ભાગ નીમ કરોલી બાબાના કૈંચી ધામની યાત્રાને દર્શાવશે, જ્યારે ત્રીજો ભાગ તેમના ભક્તો પર ધ્યાન કેન્દ્રિત કરશે.
