રાજકોટમાં ખેડૂતોએ રસ્તા પર દૂધ-શાકભાજી ફેંકી કર્યો વિરોધ : ચકકા જામનો પ્રયાસ

રાજકોટ સહિત સૌરાષ્ટ્રના ખેડૂતો સરકાર તરફથી પોષણક્ષમ ભાવ ન મળતા ભારે નારાજ છે. આજે મોરબી રોડ પર આવેલા બેડી ગામ પાસે ખેડૂતો એકઠા થયા હતા અને દૂધ-શાકભાજી રસ્તા પર ફેંકી વિરોધ દર્શાવ્યો હતો. જો કે, ચક્કાજામનો પ્રયાસ કરતા 10થી વધુ લોકોની પોલીસે અટકાયત કરી હતી. ઉલ્લેખનીય છે કે આવું આંદોલન રાજકોટ જિલ્લા સહિત સૌરાષ્ટ્રના અમુક ગામડાઓમાં છેલ્લા 3 દિવસથી ચાલી રહ્યું છે.

ભાજપ સરકાર ખેડૂતોને ઉપજના પોષણક્ષમ ભાવ નથી આપતી તેવા રોષ સાથે ખેડૂતો સાથે કોંગ્રેસ પણ રસ્તા પર ઉતરી આવી હતી. કોંગ્રેસ અને ખેડૂતોએ રસ્તા પર દૂધ અને શાકભાજી ઢોળી એવું દર્શાવ્યું હતું કે, આની કોઇ ઉપજ નથી તો ફેંકી દેવું સારુ, ભાજપ હાય હાયના સૂત્રોચ્ચાર કરી વધુ ઉગ્ર આંદોલનની ચીમકી આપી હતી.

છેલ્લા ત્રણ દિવસથી ખેડૂતો કોંગ્રેસ સાથે મળી રસ્તા પર અનેક લીટર દૂધ ઢોળી નાખે છે અને શાકભાજી રસ્તા પર ફેંકી દે છે. જે હાઇવે પર ચાલતા વાહનો તેના પર ફરી જતા હોય છે. આટલુ જ જો ગરીબોને કે નિરાધારોને મળી જાય તો તેનુ ભુખ્યું પેટ ભરાય શકે છે. વિરોધ કરવા માટે અન્ય કેટલાય રસ્તાઓ છે તેવી લોક મુખે ચર્ચા ચાલી રહી છે.