ભાવનગર : માત્ર 72 કલાકના સમય ગાળામાં જ શહેરમાં બની હત્યાની બીજી ઘટના, પોલીસે તપાસ હાથ ધરી

ભાવનગરમાં એક બાદ એક હત્યાની ઘટનાઓ બની રહી છે, ત્યારે શહેરના નિર્મળનગર વિસ્તારમાં તીક્ષ્ણ હથિયારના ઘા ઝીંકી એક આધેડની હત્યા કરી દેવામાં આવી હતી. માત્ર 72 કલાકના સમય ગાળામાં જ શહેરમાં હત્યાની બીજી ઘટના બનતા હત્યારાનું પગેરું મેળવવા માટે હાલ પોલીસે વધુ તપાસ હાથ ધરી છે.

ભાવનગર શહેરના ખૂબ જ ગીચ વસ્તી ધરાવતા નિર્મળનગર વિસ્તારમાં હત્યાની ઘટના પ્રકાશમાં આવી છે. નિર્મળનગરની શેરી નં. 7માં રહેતા ભરત મેઘાણી નામના 57 વર્ષીય આધેડની તીક્ષ્ણ હથિયારના ઘા ઝીંકી જાહેરમાં હત્યા કરવામાં આવી હતી.

મળતી માહિતી અનુસાર, ભરત મેઘાણી નિર્મળનગરમાં આવેલી 7 નંબરની શેરીમાંથી પસાર થઈ રહ્યા હતા, તે દરમ્યાન 4 જેટલા અજાણ્યા ઈસમો આવી ભરત મેઘાણી ઉપર તીક્ષ્ણ હથિયાર વડે ઉપરા છાપરી ઘા ઝીંક્યા હતા. જેના પગલે ભરત મેઘાણીનું ઘટના સ્થળે જ મોત નીપજ્યું હતું. ત્યાર બાદ ચારેય અજાણ્યા ઇસમો ભરત મેઘાણીની હત્યા કરી ઘટના સ્થળેથી ફરાર થઈ ગયા હતા. અચાનક બનેલી ઘટનાને પગલે સમગ્ર વિસ્તારમાં અફરા તફરીનો માહોલ સર્જાયો હતો. હત્યાના બનાવની જાણ થતાં જ ભાવનગર ડીવાયએસપી સહિતનો પોલીસ કાફલો ઘટના સ્થળે ધસી આવ્યો હતો. માત્ર 72 કલાકના સમય ગાળામાં જ શહેરમાં હત્યાની બીજી ઘટના બનતા હત્યારાનું પગેરું મેળવવા માટે હાલ પોલીસે ઝીણવટ ભરી તપાસ હાથ ધરી છે.