આજે Asia Cup Final, શ્રીલંકાની છઠ્ઠી અને પાકિસ્તાનની ત્રીજીવાર ચેમ્પિયન બનવા પર નજર.!

એશિયા કપ T20ની ફાઇનલ મેચ રવિવારે શ્રીલંકા અને પાકિસ્તાન વચ્ચે રમાશે. આર્થિક સંકટ વચ્ચે શ્રીલંકા ટૂર્નામેન્ટ જીતશે તો તેના દેશવાસીઓને થોડી ખુશીની ક્ષણો મળશે. પરંતુ આ માટે તેણે ત્રણ દિવસમાં બીજી વખત પાકિસ્તાન જેવી મજબૂત ટીમને હરાવવી પડશે. શ્રીલંકા એક રીતે એશિયા કપનું યજમાન છે, પરંતુ સુરક્ષાના કારણોસર તે પોતાના દેશમાં તેનું આયોજન કરી શક્યું નથી અને તેથી સંયુક્ત આરબ અમીરાતને આ ટૂર્નામેન્ટનું આયોજન કરવાની તક મળી. ફાઇનલમાં બંને વચ્ચે આ ચોથી ટક્કર હશે. શ્રીલંકા છેલ્લા ત્રણમાંથી બે વખત જીતવામાં સફળ રહ્યું છે.

સુપર ફોરમાં દાસુન શનાકાની આગેવાની હેઠળની શ્રીલંકન ટીમના પ્રદર્શનને જોતા કહી શકાય કે બાબર આઝમની આગેવાની હેઠળની પાકિસ્તાની ટીમ માટે પડકાર કોઈપણ રીતે આસાન નહીં હોય. એશિયન ક્રિકેટ કાઉન્સિલ હોય કે દુબઈના દર્શકો દરેક ઈચ્છતા હતા કે ફાઈનલ મેચ ભારત અને પાકિસ્તાન વચ્ચે થાય પરંતુ શ્રીલંકાએ શાનદાર પ્રદર્શન કરીને તેના તમામ સમીકરણો બગાડી નાખ્યા.

તેઓએ શુક્રવારે સુપર ફોરની અંતિમ મેચમાં તેમના અંતિમ હરીફ પાકિસ્તાન સામે આસાન વિજય નોંધાવ્યો હતો. આ સાથે તેની ટીમ મનોબળ વધારતા ફાઇનલમાં પ્રવેશ કરશે પરંતુ દુબઈમાં પાકિસ્તાનને પ્રેક્ષકોનો ભરપૂર સમર્થન મળવાની સંભાવના છે અને આવી સ્થિતિમાં બાબર આઝમ, મોહમ્મદ રિઝવાન, મોહમ્મદ નવાઝ અને નસીમ શાહ જેવા ખેલાડીઓ તેમના શ્રેષ્ઠ પ્રયાસ કરશે.