વડોદરા : દૂધ લેવા નીકળેલી મહિલાને બાઈકચાલકે ફંગોળી, બન્નેનું ઘટના સ્થળે મોત...
જૂના પાદરા રોડ ઉપર પૂરપાટ ઝડપે ધસી આવેલા બાઈકચાલકે મહિલાને એડફેટે લેતાં બન્નેનું ઘટના સ્થળે કમકમાટીભર્યું મોત નીપજ્યું હતું.
વડોદરા શહેરના જૂના પાદરા રોડ ઉપર પૂરપાટ ઝડપે ધસી આવેલા બાઈકચાલકે મહિલાને એડફેટે લેતાં બન્નેનું ઘટના સ્થળે કમકમાટીભર્યું મોત નીપજ્યું હતું. તો બીજી તરફ, સમગ્ર ઘટનાના સીસીટીવી ફૂટેજ સામે આવતા પોલીસે આગળની કાર્યવાહી હાથ ધરી છે.
મળતી માહિતી અનુસાર, વડોદરા શહેરના જૂના પાદરા રોડ ઉપર વહેલી મંજુલા પટેલ નામની મહિલા દૂધ લેવા નીકળ્યા હતા, ત્યારે અક્ષર ચોક તરફથી બાઈક લઈને પૂરપાટ આવી રહેલા બાઇકચાલક રાધવ ખેરસિંગરે મહિલાને અડફેટમાં લીધી હતી. આ ઘટનામાં મહિલાનું સ્થળ પર જ કરુણ મોત નીપજ્યું હતું. આ સાથે જ મોટરસાઇકલ ચાલક પણ રોડ ઉપર પટકાતાં તેનું પણ સ્થળ પર મોત નીપજ્યું હતું. બનાવના પગલે વહેલી સવારે મોર્નિંગ વોકમાં નીકળેલા લોકો ઘટના સ્થળે દોડી આવ્યા હતા, જ્યાં બન્નેના મૃતદેહોને એમ્બ્યુલન્સ બોલાવીને સયાજી હોસ્પિટલ ખાતે ખસેડવામાં આવ્યા હતા, જ્યારે અકસ્માત બાદ ફુલ સ્પીડમાં બાઈક અથડાતી હોવાની ઘટનાના સીસીટીવી પણ સામે આવ્યા છે. બનાવના પગલે પરિવારજનો અને સોસાયટીના લોકો હોસ્પિટલ ખાતે દોડી આવ્યા હતા. અરેરાટી ફેલાવી દેનાર બનાવ અંગેની જાણ પોલીસને થતાં પોલીસ પણ સ્થળ પર દોડી આવી હતી. પોલીસે અકસ્માતનો ગુનો દાખલ કરી કાર્યવાહી હાથ ધરી છે. પોલીસે જણાવ્યું હતું કે, મરનાર યુવાન મૂળ મધ્યપ્રદેશનો છે, અને તેની માતા વિધવા છે. માતા MPથી વડોદરા આવવા નીકળી ગયાં છે. યુવાન એકલો રહેતો હતો અને સવારે નોકરી જવા નીકળ્યો તે દરમ્યાન આ ઘટના સર્જાય હતી.