કોરોના રિટર્નસ ! 24 કલાકમાં વિશ્વભરમાં કોરોનાના 5.37 લાખ કેસ નોંધાયા

જે કોરોના વાયરસનું નામ આપણે સૌ ભૂલવાનો પ્રયત્ન કરી રહ્યા હતા, તેના કેસ એકવાર ફરી વધતા હોય તેવું સામે આવી રહ્યું છે. ચીનમાં કોરોનાના કેસ સતત વધી રહ્યા છે. ચીનમાં કોરોનાનો વિસ્ફોટ થતા જ હવે દુનિયાભરમાં કોરોનાના કેસમાં આંકડાઓમાં ઝડપથી વધારો થઇ રહ્યો છે. મળી રહેલા સમાચાર મુજબ ચીનની સાથે અમેરિકા, જાપાન, દક્ષિણ કોરિયા જેવા દેશોમાં પણ કોરોનાના કેસ અચાનક વધવા લાગ્યા છે.

આપને જણાવી દઇએ કે, છેલ્લા 24 કલાકમાં સમગ્ર વિશ્વમાં 5.37 લાખ નવા કેસ નોંધાયા છે.ચીનમાં કેસ વધતા જ સમગ્ર દુનિયા પર તેનો ખતરો દેખાઇ રહ્યો છે. એકલા જાપાનની જો વાત કરીએ તો છેલ્લા 24 કલાકમાં જાપાનમાં સૌથી વધુ કેસ નોંધાયા છે. અહીં છેલ્લા 24 કલાકમાં કોરોનાના 2.06 લાખ કેસ સામે આવ્યા છે. વળી, કોરોનાને કારણે 296 લોકોના મોત થયા છે. અમેરિકામાં પણ 50 હજારથી વધુ કેસ મળી આવ્યા છે. જ્યારે 323 લોકોએ જીવ ગુમાવ્યા છે. બીજી તરફ ચીનમાં કોરોનાથી તબાહી ચાલુ છે. અહીં માત્ર કેસો જ ઝડપથી વધી રહ્યા છે એટલું જ નહીં પરંતુ રોગચાળાને કારણે લોકો પોતાનો જીવ પણ ગુમાવી રહ્યા છે. હાલત એવી છે કે દર્દીઓની સારવાર માટે હોસ્પિટલમાં જગ્યા બચી નથી. વર્લ્ડ હેલ્થ ઓર્ગેનાઈઝેશન (WHO)એ પણ આ હકીકતનો સ્વીકાર કર્યો છે.WHOએ કહ્યું કે કોરોના ની વર્તમાન લહેરને કારણે ચીનમાં હોસ્પિટલ ભરાઈ ગઈ છે. ચીન સિવાય અમેરિકા, જાપાન સહિત વિશ્વના અન્ય ઘણા દેશોમાં કોરોનાના કેસ ઝડપથી વધી રહ્યા છે. આવી સ્થિતિમાં ભારત સરકારની સાથે રાજ્યો પણ એલર્ટ પર આવી ગયા છે. કોરોનાના આંકડાઓ પર નજર રાખનાર સંસ્થા વર્લ્ડોમીટર અનુસાર છેલ્લા 24 કલાકમાં વિશ્વભરમાં 5.37 લાખ કેસ નોંધાયા છે. તે જ સમયે, રોગચાળાને કારણે 1396 લોકોના મોત થયા છે. વિશ્વભરમાં અત્યાર સુધીમાં કોરોનાના 65,94,97,698 કેસ મળી આવ્યા છે. ત્યાં 200 મિલિયન સક્રિય કેસ છે.