રશિયા-યુક્રેન યુદ્ધ: અમેરિકી રાષ્ટ્રપતિ 25 માર્ચે પોલેન્ડ જશે, પુતિનને રોકવા માટે બનાવશે રણનીતિ

છેલ્લા એક મહિનાથી યુક્રેન પર જોરશોરથી હુમલો કરી રહેલા રશિયાને રોકવા માટે અમેરિકા વધુ એક દાવ રમવા જઈ રહ્યું છે. હવે અમેરિકી રાષ્ટ્રપતિ જો બાઈડેન યુરોપિયન દેશો સાથે સીધી વાત કરશે અને રશિયાને રોકવા માટેની રણનીતિ તૈયાર કરશે. આ માટે તે 25 માર્ચે પોલેન્ડ જશે.

વ્હાઇટ હાઉસના જણાવ્યા અનુસાર જો બાઈડેન પોલેન્ડના રાષ્ટ્રપતિ સાથે દ્વિપક્ષીય વાતચીત પણ કરશે. આ દરમિયાન તે એ પણ જણાવશે કે માનવતાવાદી સંકટને રોકવા માટે અમેરિકા તેના સહયોગીઓ સાથે મળીને શું કરી રહ્યું છે. પ્રેસ સચિવ જેન સાકીએ રવિવારે રાત્રે એક નિવેદનમાં જણાવ્યું હતું કે બાઈડેન પહેલા બ્રસેલ્સ અને પછી પોલેન્ડ જશે અને તેના નેતાઓ સાથે મુલાકાત કરશે. યુક્રેન કટોકટી દરમિયાન પોલેન્ડ સૌથી મોટા શરણાર્થી દેશ તરીકે ઉભરી આવ્યું છે અને તેણે રશિયા સામે તીખી પ્રતિક્રિયા આપી છે.