ભરૂચ : નબીપુર નજીક ટેમ્પો, રીક્ષા અને કન્ટેનર વચ્ચે ગમખ્વાર અકસ્માત, ટેમ્પો ચાલકનું ઘટના સ્થળે મોત…

ભરૂચ જિલ્લાના નબીપુર નજીક નેશનલ હાઇવે નં. 48 ઉપર ટેમ્પો, રીક્ષા અને કન્ટેનર વચ્ચે ગમખ્વાર અકસ્માત સર્જાયો હતો. આ અકસ્માતની ઘટનામાં ટેમ્પો ચાલકનું ઘટના સ્થળે મોત નિપજતા પોલીસે વધુ તપાસ હાથ ધરી હતી. ભરૂચ જિલ્લામાંથી પસાર થતા નેશનલ હાઇવે નં. 48 ઉપર અવાર નવાર અકસ્માતોની ધટના બને છે.

એટલું જ નહીં, આ અકસ્માતમાં કેટલાય લોકો જીવ પણ ગુમાવે છે, ત્યારે એવી જ એક ઘટના ગતરોજ સાંજના સમયે સર્જાય હતી. નબીપુર-કવિઠા ચોકડી ઓવરબ્રિજ ઉતરતા વડોદરા તરફથી ભરૂચ તરફ એક આઈશર ટેમ્પો નંબર TN-77-Q-4658 જઈ રહ્યો હતો, તે સમયે બ્રિજ ઉતરતા એક પેસેન્જર રીક્ષાને ટક્કર મારી હતી.

આ સાથે જ નબીપુર-કવિઠા પાટિયા પાસે આવેલ ફાઈવ સ્ટાર હોટલ નજીક પણ એક કન્ટેનર નંબર GJ-06-HK-2043, જે ભરૂચ તરફ જઈ રહ્યું હતું તેમાં પણ પાછળથી ધડાકાભેર ઘુસી જતા ટેમ્પા ચાલકનું ઘટના સ્થળે જ કમકમાટી ભર્યું મોત નિપજ્યું હતું. અકસ્માતના પગલે હાઇવે પર વડોદરાથી ભરૂચ તરફ ભારે ટ્રાફિક જામના દ્રશ્યો સર્જાયા હતા. બનાવની જાણ થતાં જ નબીપુર પોલીસ મથકનો કાફલો તુરંત ઘટના સ્થળે દોડી આવી વધુ તપાસ હાથ ધરી હતી, જ્યારે ભારે જહેમત બાદ પોલીસે ટ્રાફિક હળવો કરાવ્યો હતો.