સાબરકાંઠા : પ્રાંતિજની કાટવાડ ચોકડી પાસે ટ્રક અને ટેન્કર વચ્ચે અકસ્માત, ટેન્કર ચાલકના શરીરના 2 ટુકડા થયા...

• પ્રાંતિજની કાટવાડ ચોકડી પાસે સર્જાયો ગમખ્વાર અકસ્માત

• માર્બલ ભરેલા ટ્રક સાથે સિમેન્ટ ભરેલ એક ટેન્કર અથડાયું

• અકસ્માતમાં 25 વર્ષીય ચાલકના શરીરના 2 ટુકડા થયા

• અકસ્માતમાં અન્ય એક ઇજાગ્રસ્તને સારવાર અર્થે ખસેડાયો

• પોલીસે અકસ્માતે મોતનો ગુન્હો નોંધી વધુ કાર્યવાહી હાથ ધરી

 સાબરકાંઠા જિલ્લાના પ્રાંતિજમાં માર્બલ ભરેલા ટ્રક સાથે સિમેન્ટ ભરેલ ટેન્કર અથડાતાં ગમખ્વાર અકસ્માતમાં 25 વર્ષીય ચાલકના શરીરના 2 ટુકડા થયા હતા. મળતી માહિતી અનુસાર, સાબરકાંઠા જિલ્લાના પ્રાંતિજની કાટવાડ ચોકડી પાસે ગમખ્વાર અકસ્માત સર્જાયો હતો. જેમાં એક 25 વર્ષીય ટેન્કર ચાલકનું કરુણ મોત નીપજ્યું હતું.

રાજસ્થાનથી અમદાવાદ તરફ માર્બલ લઈ જતા ટ્રકની પાછળ સિમેન્ટ ભરેલું ટેન્કર ધડાકાભેર અથડાયું હતું. જેના કારણે ટેન્કર ચાલક દિલીપ ઠાકોરના શરીરના 2 ટુકડા થઈ ગયા હતા. અકસ્માતની જાણ થતાં પ્રાંતિજ પોલીસ તાત્કાલિક ઘટનાસ્થળે પહોંચી ક્રેનની મદદથી બન્ને વાહનોને અલગ કરવામાં આવ્યા હતા.

ત્યારબાદ મૃતદેહને પ્રાંતિજની સરકારી હોસ્પિટલમાં પોસ્ટમોર્ટમ માટે ખસેડવામાં આવ્યો હતો. આ સાથે જ અકસ્માતમાં અન્ય ઇજાગ્રસ્ત ટ્રક ચાલક હીરાલાલ રબારીને સારવાર અર્થે હિંમતનગર સિવિલ હોસ્પિટલમાં દાખલ કરવામાં આવ્યા છે. પોલીસે અકસ્માતે મોત નોંધી આગળની કાર્યવાહી હાથ ધરી છે.