બનાસકાંઠા જિલ્લાના સુપ્રસિદ્ધ યાત્રાધામ અંબાજીમાં ભાદરવી પૂનમના મેળાને હવે ગણતરીના દિવસો બાકી છે, ત્યારે દૂર દુરથી પદયાત્રા સંઘ લઈને આવતા પદયાત્રીઓની સુવિધા માટે વહીવટી તંત્ર દ્વારા વિશેષ સુવિધાઓ ઉભી કરવામાં આવી છે.
બનાસકાંઠા જિલ્લાના સુપ્રસિદ્ધ યાત્રાધામ અંબાજી ખાતે ભાદરવી પુનમનો મેળો તેરસ, ચૌદસ અને પૂનમ એમ સતત 3 દિવસ સુધી ભરાય છે. આ દિવસે લાખો માઈભક્તો માતાના દર્શન માટે ઉમટી પડે છે. આ સમયે અસંખ્ય લોકો અહીં પગપાળા યાત્રા કરીને પણ આવતા હોય છે, ત્યારે દૂર દૂરથી પદયાત્રા સંઘ લઈને આવતા પદયાત્રીઓ માટે જમવાનું, ચા-નાસ્તો, મેડિકલ સેવા, ન્હાવા ધોવા અને આરામ કરવાની સુવિધા મળે તે માટે ઠેર ઠેર વિસામાઓ શરૂ કરાયા છે. તો બીજી તરફ, અરવલ્લી જિલ્લાના મોડાસા-શામળાજી બાયપાસ પર આવેલી જિલ્લાની આરટીઓ કચેરી દ્વારા પણ પદયાત્રીઓને ચા-નાસ્તો મળી રહે તે માટે વિસામો શરૂ કરવામાં આવ્યો છે. આ સાથે જ ટ્રાફિક અવેરનેસ માટે પણ વિવિધ જનજાગૃતિના કાર્યક્રમોનું આયોજન કરવામાં આવી રહ્યું છે. દરેક પદયાત્રીઓને અકસ્માત ન નડે અને રાત્રે અંધારામાં અન્ય વાહનચાલકોને પણ પદયાત્રી જઇ રહ્યા છે, તેનો ખ્યાલ આવે તે માટે પદયાત્રીઓને રેડિયમવાળા જેકેટ આપવામાં આવ્યા હતા. આ ઉપરાંત દરેક વાહનો પર રીફલેક્ટર લગાડવામાં આવ્યા હતા.