પંચમહાલ : ગોધરા નગરપાલિકામાં ઓપરેશન lotus, ભાજપે હાંસલ કરી સત્તા

ગોધરા નગર પાલિકાના સત્તા કારણમાં ભારે હલચલ સર્જનારી વધુ એક ઘટનામાં અપક્ષ સદસ્યોની બહુમતીઓમાં ભા.જ.પ.ને સત્તા ઓથી દૂર રાખીને પ્રમુખ બનેલા સંજય સોની આજરોજ કમલમ ખાતે વિધિવત ભા.જ.પ.માં જોડાઈ જતા અપક્ષ સદસ્યોની છાવણીમાં જાણે સાંપ સૂંઘી ગયો હોય એવા જબરદસ્ત સન્નાટો એટલા માટે પ્રસરી જવા પામ્યો છે કે ગોધરા નગર પાલિકામાં અપક્ષોની સરકાર માંથી ખુદ સેનાપતિ જ લશ્કરને છોડીને ભા.જ.પ.માં "દૂધમાં સાકર ભળે"એમ જોડાઈ જતા હવે ગોધરા નગર પાલિકામાં અપક્ષોના શાસનના અકાળે અંત સાથે ભા.જ.પ.નો કેસરિયો ધ્વજ ફરકતો થયો હોવાના આ વધામણાઓમાં ગોધરા નગર પાલિકા કચેરી બહાર ભા.જ.પ. સદસ્યો અને અગ્રણી કાર્યકરો દ્વારા ધૂમ ધડાકા સાથે દારૂખાનું ફોડવામાં આવ્યું આ અવાજ સાંભળીને પશ્ચિમ વિસ્તારના અપક્ષ સદસ્યો પણ શૂન્યમસ્ક બની ગયા હોવાનો તિખારો દેખાયો હતો.!!

ગોધરા નગર પાલિકામાં ચાર મહિનાઓ પૂર્વે ભા.જ.પ.ને સત્તા ઓથી દૂર રાખીને બહુમતી અપક્ષ સદસ્યોના ટેકાથી વટભેર સંજય સોનીને પ્રમુખ અને અક્રમ પટેલ ઉપપ્રમુખ પદે બેસાડ્યા બાદ કેટલાક અપક્ષ સદસ્યોમાં મલાઈદાર સમિતિઓ માટે શરૂ થયેલા આ "આંતરકલહ"ની સોદાબાજીઓ વચ્ચે અપક્ષમાં રહેલ ભા.જ.પ.દ્વારા નગર પાલિકાની તમામ સમિતિઓની રચનાઓ કરીને રથયાત્રાના વિજય મુહૂર્તમાં દરેક અધ્યક્ષોએ ચેમ્બરોનો હવાલો લઈ લીધો હતો.!! ગોધરા નગર પાલિકામાં વિજય મુહૂર્તમાં સમિતિઓની સત્તાઓ સંભાળી લેવાના ભા.જ.પ.ના આ માસ્ટર સ્ટ્રોક બાદ આજરોજ ગોધરા નગર પાલિકા પ્રમુખ સંજય સોની આજરોજ ગોધરા સ્થિત ભા.જ.પ.ના કમલમ કાર્યાલયમાં પંચમહાલ જિલ્લા ભા.જ.પ. પ્રમુખ અશ્વિન પટેલ, ગોધરા ધારાસભ્ય સી.કે.રાઉલજી, મહામંત્રીઓ મયંક દેસાઈ, કુલદીપસિંહ સોલંકી, શહેર ભા.જ.પ.પ્રમુખ દિલીપ દસાડીયા અન્ય સદસ્યો સાથે ભા.જ.પ.માં જોડાઈ જઈને ભા.જ.પ.નો ખેસ ધારણ કરતા ગોધરા નગર પાલિકામાં અપક્ષ સરકારના શાસનના અંત સાથે ભા.જ.પા.એ સંપૂર્ણ સત્તાઓ હાંસલ કરી લીધી છે.