ભારત વધારી રહ્યું છે પોતાની પરમાણુ શક્તિ, આ 9 દેશો પાસે છે સૌથી વધુ પરમાણુ હથિયાર
કોઈપણ રાષ્ટ્ર માટે સૈન્ય સ્તરે તાકાત ખૂબ જ જરૂરી છે. એ વાતમાં કોઈ શંકા નથી કે વર્તમાન યુગમાં પરમાણુ શસ્ત્રો રાષ્ટ્રની શક્તિનો મુખ્ય આધાર છે.
કોઈપણ રાષ્ટ્ર માટે સૈન્ય સ્તરે તાકાત ખૂબ જ જરૂરી છે. એ વાતમાં કોઈ શંકા નથી કે વર્તમાન યુગમાં પરમાણુ શસ્ત્રો રાષ્ટ્રની શક્તિનો મુખ્ય આધાર છે. રશિયા-યુક્રેન યુદ્ધ દરમિયાન રશિયાએ જે રીતે પરમાણુ હુમલાના નામે દબાણ કર્યું હતું તેણે પણ ધ્યાન ખેંચ્યું હતું. હવે સ્ટોકહોમ ઇન્ટરનેશનલ પીસ રિસર્ચ ઇન્સ્ટિટ્યૂટ (SIPRI)ના રિપોર્ટમાં આ મામલે વૈશ્વિક સ્તરે બદલાતા વલણની ઝલક આપવામાં આવી છે.
એ વાત પણ સામે આવી છે કે ભારત પોતાના પરમાણુ હથિયારોના શસ્ત્રાગારમાં વધારો કરી રહ્યું છે. રિપોર્ટમાં કહેવામાં આવ્યું છે કે ભારત, પાકિસ્તાન અને ચીન પરમાણુ હથિયારોના મામલે પોતાને મજબૂત બનાવવાનો પ્રયાસ કરી રહ્યા છે. ભલે ચીનમાં સંખ્યાના મામલે કોઈ ફેરફાર થયો નથી, પરંતુ વર્ષ દરમિયાન તૈયાર કરવામાં આવેલા નવા લોન્ચર્સના આધારે તેની તાકાત વધી છે.
પાકિસ્તાન નવા પ્રકારના લોન્ચર પર પણ કામ કરી રહ્યું છે. ભારત અને પાકિસ્તાન તેમના પરમાણુ હથિયારોની સંખ્યા અંગે કોઈ સત્તાવાર આંકડા જાહેર કરતા નથી. અમેરિકા અને રશિયા પાસે વિશ્વના 90 ટકા પરમાણુ હથિયારો છે. જૂના હથિયારોના વિનાશને કારણે 2021માં આ બંનેના પરમાણુ હથિયારોની સંખ્યામાં થોડો ઘટાડો થયો છે. જો કે, ઉપયોગ કરી શકાય તેવા હથિયારોની સંખ્યા સ્થિર છે. બીજી તરફ, ઇઝરાયેલ ક્યારેય જાહેરમાં પરમાણુ શક્તિ હોવાનો દાવો કરતું નથી, પરંતુ એવું માનવામાં આવે છે કે બ્રિટન અને ઇઝરાયેલ સહિત અન્ય પરમાણુ શક્તિ ધરાવતા રાષ્ટ્રો પણ તેમની શક્તિ વધારવામાં વ્યસ્ત છે.
