હવામાન વિભાગે 5 જૂન સુધી પૂર્વોત્તર રાજ્યો માટે વરસાદની ચેતવણી કરી જારી

ભારતના પૂર્વોત્તર રાજ્યોમાં છેલ્લા કેટલાક દિવસોથી ભારે વરસાદ ચાલુ છે. મુશળધાર વરસાદને કારણે આવેલા પૂર અને ભૂસ્ખલનને કારણે 34 લોકોએ જીવ ગુમાવ્યા છે. મોટી સંખ્યામાં લોકો ઘાયલ પણ થયા છે, જેમની સારવાર ચાલી રહી છે.

એક અહેવાલ મુજબ આસામમાં 10, અરુણાચલ પ્રદેશમાં 9, મિઝોરમમાં 5 અને મેઘાલયમાં 6 લોકોના મોત થયા છે. આ દરમિયાન, ભારતીય હવામાન વિભાગે 5 જૂન સુધી પૂર્વોત્તર રાજ્યો માટે વરસાદની ચેતવણી જારી કરી છે.

ભારે વરસાદને કારણે લોકોને પૂર અને ભૂસ્ખલનથી પ્રભાવિત વિસ્તારોમાંથી બહાર કાઢવામાં આવી રહ્યા છે. આ માટે ભારતીય સેના, વાયુસેના અને આસામ રાઇફલ્સના સૈનિકો બચાવ કામગીરીમાં રોકાયેલા છે. એવું કહેવામાં આવી રહ્યું છે કે આસામના 19 જિલ્લાઓમાં 3.64 લાખથી વધુ લોકો પૂરથી પ્રભાવિત થયા છે. માર્ગ અને રેલ સેવાઓ ખોરવાઈ જવાથી લોકો ઘણી મુશ્કેલીનો સામનો કરી રહ્યા છે. મુશળધાર વરસાદને કારણે બ્રહ્મપુત્ર અને બરાક સહિત 10 મુખ્ય નદીઓ ભયના નિશાનથી ઉપર વહી રહી છે.

આસામ અને ઉત્તરપૂર્વ ભારતમાં ચોમાસાની શરૂઆતથી વિનાશ થયો છે. 1 જૂને, આસામના સિલચર શહેરમાં 24 કલાકમાં 415.8 મીમી વરસાદ નોંધાયો હતો, જે છેલ્લા 132 વર્ષમાં એક દિવસમાં સૌથી વધુ વરસાદ છે. અગાઉ 1893 માં એક દિવસમાં 290.3  મીમી વરસાદનો રેકોર્ડ નોંધાયો હતો, જે હવે વટાવી ગયો છે.