યુક્રેનથી મુંબઈ એરપોર્ટ પહોંચનારા ભારતીયો માટે ખાસ કોરિડોર બંધ પરંતુ દિલ્હીમાં અપાઈ રાહત

યુક્રેનથી વતન આવતા ભારતીયો માટે મુંબઈ એરપોર્ટ પર નવી વ્યવસ્થા કરવામાં આવી છે. આજથી મુંબઈના છત્રપતિ શિવાજી ઈન્ટરનેશનલ એરપોર્ટ પરનો સ્પેશિયલ કોરિડોર યુક્રેનથી આવતા લોકો માટે બંધ કરી દેવામાં આવ્યો હતો. તેઓએ કોરોના પ્રોટોકોલનું પાલન કરવું પડશે. બીજી તરફ દિલ્હી એરપોર્ટ પર આવનારા ભારતીયોને પ્રોટોકોલમાં થોડી રાહત આપવામાં આવી છે.

મુંબઈ એરપોર્ટે જણાવ્યું છે કે યુક્રેનથી આવનારાઓએ તેમનું કોવિડ રસીકરણ પ્રમાણપત્ર અથવા નેગેટિવ RT PCR રિપોર્ટ રજૂ કરવો પડશે. જો કોઈ મુસાફર પાસે સર્ટિફિકેટ નથી, તો તેણે એરપોર્ટ પર કોરોના ટેસ્ટ કરાવવો પડશે. તેનો ખર્ચ એરપોર્ટ દ્વારા ઉઠાવવામાં આવશે. આ મુસાફરોને નેગેટિવ રિપોર્ટ આવવા પર એરપોર્ટ છોડવા દેવામાં આવશે.

જો કોઈ મુસાફર પોઝિટિવ જોવા મળે છે, તો તેણે સરકારના કોરોના પ્રોટોકોલ મુજબ સારવાર અને અન્ય સૂચનાઓનું પાલન કરવું પડશે. બીજી તરફ યુક્રેન સંકટને કારણે દિલ્હી એરપોર્ટે પણ નવી એડવાઈઝરી જારી કરી છે. આ મુજબ, ભારતીયોને 'એર સુવિધા' પોર્ટલ પર દસ્તાવેજો અપલોડ કરવાની સુવિધા આપવામાં આવશે, ભલે તેમની પાસે કોરોનાની રસી ન હોય અને તેમનો ટેસ્ટ રિપોર્ટ નેગેટિવ ન હોય. માનવતાના આધાર પર તેમને આ છૂટ આપવામાં આવશે. આવા મુસાફરો એરપોર્ટમાં પ્રવેશ કરી શકશે. યુક્રેન પર રશિયન હુમલા બાદ મોટી સંખ્યામાં ભારતીય વિદ્યાર્થીઓ અને અન્ય લોકો ત્યાં ફસાયેલા છે. તેમને રોમાનિયા અને હંગેરી થઈને વિશેષ વિમાનો દ્વારા લાવવામાં આવી રહ્યા છે.