પવન કલ્યાણ બન્યા સાઉથના હાઇએસ્ટ પેઇડ એક્ટર, ઉસ્તાદ ભગત સિંહ માટે 170 કરોડ રૂપિયા ફી લીધી

તેલુગુ ચાહકોએ પવન કલ્યાણને થિયેટર્સમાં જોયાને ઘણા વર્ષો થઈ ગયા છે. પવન કલ્યાણ હવે રાજકારણમાં જોડાઈ ગયા છે અને આંધ્રપ્રદેશના નાયબ મુખ્યમંત્રી તરીકે સેવા આપી રહ્યા છે. તેમની રાજકીય જવાબદારીઓને કારણે તેમની ફિલ્મો વિલંબિત થઈ રહી છે જેના કારણે કરોડો રૂપિયાનું રોકાણ કરનારા નિર્માતાઓ પર દબાણ વધી રહ્યું છે. ઘણી ફિલ્મો અટકી પડી હોવાથી નિર્માતાઓ પણ પવનના સેટ પર પાછા ફરવાની રાહ જોઈ રહ્યા છે. આખરે અભિનેતા તાજેતરમાં તેની ત્રણ ફિલ્મોના નિર્માતાઓને મળ્યા અને તેમને ટૂંક સમયમાં પૂર્ણ કરવા માટે તારીખો આપવાનું વચન આપ્યું હતું.

ઉસ્તાદ ભગતસિંહ માટે મોટી ફી વસૂલવામાં આવી

સિયાસત ડોટ કોમના રિપોર્ટ અનુસાર, પવન કલ્યાણે ઉસ્તાદ ભગત સિંહ માટે 170 કરોડ રૂપિયા ફી લીધી છે. આ રકમ કોઈ તેલુગુ અભિનેતાને નોન પાન ઇન્ડિયા ફિલ્મ માટે ચૂકવવામાં આવેલી સૌથી વધુ રકમ છે. આનાથી એક વાત સાબિત થાય છે કે લાંબા સમયથી ફિલ્મોથી દૂર હોવા છતાં નિર્માતાઓને પવન કલ્યાણની બોક્સ ઓફિસ પાવરમાં ઘણો વિશ્વાસ છે.