યુપી-બિહારના વિદ્યાર્થીઓ RRB-NTPC પરીક્ષા કૌભાંડને લઈ ગુસ્સે ભરાયા, ગયા જંકશન પર ટ્રેનમાં ચાંપી આગ

બિહારમાં RRB NTPC પરિણામોમાં ગોટાળા સામે વિદ્યાર્થીઓનો વિરોધ બુધવારે ત્રીજા દિવસે પણ ચાલુ રહ્યો હતો. પોલીસના જણાવ્યા અનુસાર ગુસ્સે ભરાયેલા વિદ્યાર્થીઓએ ગયા જંક્શન પર ટ્રેનને આગ ચાંપી દીધી હતી. પોલીસે સ્થિતિને કાબૂમાં લેવા બળપ્રયોગ કરવો પડ્યો હતો. વિદ્યાર્થીઓએ પોલીસ પર પણ પથ્થરમારો કર્યો હતો.

એક પોલીસ અધિકારીએ જણાવ્યું કે યાર્ડમાં પાર્ક કરેલી ટ્રેનની એક બોગીમાં આગ લાગી હતી. આગને કાબુમાં લેવા માટે ફાયર બ્રિગેડને બોલાવવામાં આવી છે. આ સિવાય ટ્રેન પર પથ્થરમારો થયાના સમાચાર પણ છે. પટના, નવાદા, નાલંદા, બક્સર, અરાહ સહિત અન્ય ઘણા વિસ્તારોમાં વિદ્યાર્થીઓ પણ રેલ્વે ટ્રેક પર ઉતરી આવ્યા અને સૂત્રોચ્ચાર કરવા લાગ્યા. વિદ્યાર્થીઓ RRB NTPC પરીક્ષાના પરિણામમાં વિસંગતતાનો આરોપ લગાવી રહ્યા છે.

મંગળવારે પણ વિદ્યાર્થીઓએ ઘણી જગ્યાએ ટ્રેનો રોકી હતી. રેલ્વે મંત્રાલયે રેલ્વેની બંને પરીક્ષાઓ (બિન-તકનીકી લોકપ્રિય કેટેગરી અને રેલ્વે ભરતી બોર્ડની લેવલ-1) પર હાલ માટે રોક લગાવી દીધી છે. રેલ્વે મંત્રાલયે એક સમિતિની રચના કરી છે જે પરીક્ષામાં પાસ થયેલા વિદ્યાર્થીઓ અને નાપાસ થયેલા વિદ્યાર્થીઓની વાત સાંભળશે. કમિટી પોતાનો રિપોર્ટ રેલ્વે મંત્રાલયને સુપરત કરશે. ત્યારપછી રેલવે મંત્રાલય આગળનો નિર્ણય લેશે. વિદ્યાર્થીઓના વિરોધને જોતા હાલમાં રેલ્વે મંત્રાલયે રેલ્વેની પરીક્ષા પર પ્રતિબંધ લગાવી દીધો છે.

ખરેખર રેલ્વે ભરતી બોર્ડની નોન ટેકનિકલ પોપ્યુલર કેટેગરીઝ પરીક્ષા 2021ના પરિણામો 14-15 જાન્યુઆરીના રોજ બહાર પાડવામાં આવ્યા હતા. આ પરીક્ષાઓમાં 1 કરોડ 40 લાખ ઉમેદવારોએ હાજરી આપી હતી અને પરિણામ આવ્યા બાદ વિદ્યાર્થીઓમાં અસંતોષનો મામલો સામે આવ્યો છે. જેનો વિદ્યાર્થીઓ વિરોધ કરી રહ્યા છે. બિહાર અને દેશના અન્ય ભાગોમાં વિદ્યાર્થીઓ દ્વારા આ વિરોધ કરવામાં આવી રહ્યો છે.