અંકલેશ્વરના પાનોલી GIDCમાં રસ્તાની કામગીરી દરમિયાન થયું ગુજરાત ગેસની લાઇનમાં ભંગાણ

અંકલેશ્વરના પાનોલી ખાતે રસ્તાની કામગીરી દરમિયાન ગુજરાત ગેસનીલાઇનમાં ભંગાણ સર્જાતા એક સમયે સૌના જીવ ટાળવે ચોંટ્યા હતા.જો કે ફાયર વિભાગે સમયસર પહોંચી જતા અને સમારકામની કામગીરી હાથ ધરાતા મોટી દુર્ધટના ટળી હતી.

અંકલેશ્વરના પાનોલી ખાતે આજે મોડી સાંજે પણ રસ્તાની કામગીરી ચાલી રહી હતી. દરમિયાન એકાએક રસ્તાની નીચે ધરબાયેલ ગુજરાત ગેસ કંપનીની ગેસ લાઇનમાં ભંગાણ સર્જાયું હતું. ગેસ લાઇનમાં ભંગાણ સર્જાતા જ ત્યાં હાજરજનોના જીવ પડીકે બંધાયા હતા. જો કે હાજરજનોએ સમયસુચકતા વાપરી ઘટનાની જાણ ફાયર વિભાગને કરતા જ ફાયર ટેન્ડર ઘટના સ્થળે દોડી આવ્યું હતું અને ગુજરાત ગેસ કંપનીના કર્મીઓ પણ ત્યાં દોડી આવ્યા હતા. તેમણે તુરંત સમારકામ હાથધરતા ભંગાણમાંથી ગેસ વછુટતો અટકાવી ભંગાણનું સમાર કામ પૂર્ણ કર્યું હતું. આ ઘટનામાં કોઇ જાનહાની ના નોંધાતા સૌએ રાહતનો દમ લીધો હતો.