અદાણી કેસ પર વિપક્ષનો હંગામો, લોકસભા-રાજ્યસભાની કાર્યવાહી બપોરે 2 વાગ્યા સુધી સ્થગિત

બજેટ રજૂ થયા બાદ સંસદમાં એક પણ દિવસ ચર્ચા થઈ નથી. ગૌતમ અદાણી કેસને લઈને વિપક્ષી પક્ષો સંસદના બંને ગૃહોમાં સતત હોબાળો મચાવી રહ્યા છે અને આ મુદ્દે સંસદીય સમિતિની રચના કરવાની માંગ કરી રહ્યા છે, જ્યારે શાસક પક્ષ રાષ્ટ્રપતિના અભિભાષણ પર આભાર પ્રસ્તાવ પર ચર્ચાની માંગ કરી રહ્યો છે. આજે પણ હંગામા બાદ લોકસભા-રાજ્યસભાની કાર્યવાહી બપોરે 2 વાગ્યા સુધી સ્થગિત કરી દેવામાં આવી છે. બીજી તરફ કોંગ્રેસ આજે દેશભરમાં એલઆઈસી ઓફિસની બહાર વિરોધ પ્રદર્શન કરી રહી છે.

વિરોધ પક્ષો કોંગ્રેસ, DMK, NCP, BRS, JDU, SP, CPM, CPI, કેરળ કોંગ્રેસ (જોસ મણિ), JMM, RJD, RSP, AAP, IUML, RJD અને શિવસેનાએ સંસદ સત્ર પહેલા મહત્વપૂર્ણ બેઠક યોજી હતી. આ બેઠક LoP મલ્લિકાર્જુન ખડગેની ચેમ્બરમાં થઈ હતી. આ દરમિયાન અદાણી-હિંડનબર્ગ અને અન્ય મુદ્દાઓ પર વ્યૂહરચના બનાવવા પર ચર્ચા થઈ હતી. સૂત્રોનું માનીએ તો વિપક્ષી દળોએ નિર્ણય લીધો છે કે તેઓ સંસદના બંને ગૃહોમાં સ્થગિત પ્રસ્તાવ આપશે. અદાણી કેસ પર ચર્ચાની માંગ કરવામાં આવશે. આ સિવાય બીજું કંઈ કામ નહીં કરે.