વડોદરા: ખેલો ઈન્ડિયા વિમેન્સ લીગ ગુજરાત વેઈટલિફ્ટિંગ ચેમ્પિયનશિપમાં બે ખેલાડીઓએ ગોલ્ડ અને સિલ્વર મેડલ હાંસલ કર્યો

વડોદરાની વેઇટલિફ્ટર અશ્વિની છેત્રી અને નિવેદિતા કલંબે નવસારી ખાતે યોજાયેલી ખેલો ઇન્ડિયા વુમન્સ લીગ ગુજરાત વેઇટલિફ્ટિંગ ચેમ્પિયનશિપમાં મેડલ જીતીને શહેરનું નામ રોશન કર્યું છે.

નવસારીમાં 27મી ઓગસ્ટ 2023ના રોજ આયોજિત સ્પર્ધામાં બંને ખેલાડીઓએ વિવિધ વજન કેટેગરીમાં ભાગ લીધો હતો. પોતાની શ્રેષ્ઠ રમત બતાવીને બંનેએ પોતપોતાની કેટેગરીમાં મેડલ જીત્યા. બંને રમતવીરોએ મહિલા રમતગમતના વિકાસમાં તેમના ઉત્કૃષ્ટ યોગદાન માટે પ્રશંસાનું પ્રમાણપત્ર પણ મેળવ્યુ અને મહિલા રમતવીરોને સશક્તિકરણ અને રમતગમતમાં સમાનતાને પ્રોત્સાહન આપવામાં તેમની સક્રિય ભૂમિકાને ખેલો ઇન્ડિયા દ્વારા માન્યતા આપવામાં આવી છે.

નિવેદિતાએ તેની પ્રથમ વેઇટલિફ્ટિંગ સ્પર્ધામાં સિલ્વર મેડલ જીત્યો અને કોમનવેલ્થ અને ઓલિમ્પિકમાં ભારતનું પ્રતિનિધિત્વ કરવાના તેના લક્ષ્ય તરફ વધુ એક પગલું ભર્યું છે. 19 વર્ષીય અશ્વિની છેત્રી એ માત્ર નવ મહિનાની તાલીમમાં વેઈટલિફ્ટિંગમાં બે ગોલ્ડ મેડલ જીત્યા. એક પોલીસ કર્મચારીની પુત્રી, છોટાઉદેપુરની સરકારી કોલેજમાંથી ઇલેક્ટ્રિકલ એન્જિનિયરિંગ કરી રહી છે અને તેણે આ રમતમાં કારકિર્દી બનાવવાનું પસંદ કર્યું અને ઓલિમ્પિકમાં ભારતનું પ્રતિનિધિત્વ કરવા માંગે છે.