ભરૂચ જિલ્લાના નેત્રંગ ખાતે વિજીલીન્સ પોલીસના દરોડામાં ટેમ્પામાં ઘરવખરીના સામાનમાં સંતાડીને વિદેશી દારૂની હેરાફેરીનો પદૉફાશ થતાં સમગ્ર વિસ્તારમાં ફફડાટ મચી જવા પામ્યો હતો.

મળતી માહિતી અનુસાર, નેત્રંગના ચાર રસ્તા ઉપરથી સફેદ રંગના અશોક લેલન્ડ ટેમ્પા નં. જીજે ૦૧ એચટી ૦૮૦૨માં મોટાપાયે વિદેશી દારૂની હેરાફેરી થતી હોવાની બાતમી વિજીલીન્સ પોલીસને મળતા પુરતા પોલીસે બંદોબસ્ત સાથે દરોડા પાડ્યા હતા, જેમાં નેત્રંગ ચાર રસ્તા ઉપર ટેમ્પો  જણાઈ  આવતા  તેને થોભાવી તેમાં તપાસ કરતા ઘરવખરીનો સામાન નજરે પડ્યો હતો, પરંતુ વિજીલીન્સ પોલીસે ટેમ્પા ઉપરના ભાગે ચઢી તપાસણી કરતાં મોટા જથ્થામાં વિદેશી દારૂનો જથ્થો મળી આવ્યો હતો.

દારૂ પકડાયાની ઘટનાની જાણ વાયુવેગે પ્રસરતા નેત્રંગ ચાર રસ્તા ઉપર લોકટોળા ઉમટી પડતા ટેમ્પાને તાત્કાલિક નેત્રંગ પોલીસ મથકે લઇ જવામાં આવ્યો હતો. જેમાં વિદેશી દારૂની પેટી ૬૧ નંગ જેની કિંમત રૂપિયા ૩.૨૬.૪૦૦, ૨ નંગ મોબાઈલ, રોકડ રકમ રૂપિયા ૫૩૨૦, અશોક લેલન્ડ ટેમ્પો જેની કિંમત રૂપિયા ૪.૨૫.૦૦૦ અને ઘર વકરીનો સામાન કિમત રૂપિયા ૩૫૦૦ સહિત કુલ ૭.૬૩.૭૨૦નો મુદ્દામાલ પોલીસે કબ્જે કર્યો હતો, જ્યારે મોટા જથ્થામાં વિદેશી દારૂની હેરાફેરી કરતાં રંગે હાથ ઝડપાયેલા મહારાષ્ટ્રના રહેવાસી પ્રતાપસિંહ રાવત અને દીનેસીંગ રાવતને દબોચી જેલ ભેગા કરી દીધા હતા, જ્યારે ગેરકાયદેસર વિદેશી દારૂનો જથ્થો મંગાવનાર અને અંકલેશ્વર ખાતે રહેતા રમણ ગુજૅર સહિત દારૂ લેવા આવનાર અન્ય એક ઇસમને વોન્ટેડ જાહેર કરવામાં આવ્યો હતો.  નેત્રંગ પોલીસે તમામ આરોપીઓ વિરુદ્ધ ગુનો નોંધી વધુ તપાસ હાથધરી હતી.