દહેજની વિદેશી કંપનીના ગેઇટ ઉપર ભરૂચ ધારાસભ્યનું વિરોધ પ્રદર્શન
૬ ગુજરાતી કામદારોને અચાનક છુટા કરવા મુદ્દે યોગ્ય જવાબ ન અપાતા કરાયું વિરોધ પ્રદર્શન
દહેજમાં આવેલ ઇનઓસ સ્ટાયલોલ્યુશન ઇન્ડિયા લિમિટેડ કંપનીમાં કામ કરતા ઓફીસર લેવલના ગુજરાતી કર્મચારીઓને અચાનક છુટાકરાતા વિદેશી કંપની સત્તાધીશો પાસે રજૂઆત માટે પહોંચેલા ભરૂચના ધારાસભ્ય દુષ્યંત પટેલની રજૂઆત ધ્યાને ન લેતાં ધારાસભ્યએ કંપનીના ગેઇટ બહાર જ ઉભા રહી વિરોધ નોંધાવ્યો હતો.
પ્રાપ્ત વિગત અનુસાર દહેજ ખાતે કાર્યરત વિદેશી કંપની ઇનઓસ સ્ટાયલોલ્યુશન ઇન્ડિયા લિમિટેડના સત્તાધિશો દ્વારા તેમની કંપનીમાં ઓફીસર લેવલે કામ કરતા ૬ જેટલા ગુજરાતીકર્મચારીઓને વગરવાંકગુને જ ગત તા.૫મીના રોજ અચાનક તારીખ ૬ થી ફરજ મૂક્ત કરવાનો લેટર આપી દેવાતા છુટા કરાયેલ તમામ કર્મચારીઓ ભરૂચ ધારાસભ્ય દુષ્યંત પટેલ પાસે પહોંચ્યા હતા.
જયાં તેમણે તેમની સાથે કંપની દ્વારા કરાયેલ અન્યાયની વાત કરતા આ સમસ્યાનો નિકાલ લાવવા ભરૂચના ધારાસભ્ય દુષ્યંતપટેલ જાતે આજે દહેજ ખાતે આવેલ વિદેશી કંપની ઇનઓસ સ્ટાયલોલ્યુશન ઇન્ડિયા લિમિટેડ ખાતે પહોંચ્યા હતા. તેમણે કંપની સત્તાધિશોને ગુજરાતી કર્મચારીઓને છુટા કર્યા તે બાબતે રજૂઆત કરતા સત્તાધિશો દ્વારા તેમની રજૂઆતને ધ્યાને ન લેતાં, ધારાસભ્ય દુષ્યંત પટેલે જયાં સુધી કંપની સત્તાધિશો યોગ્ય નિરાકરણ નહીં લાવે, બાંહેધારી નહીં આપે, ત્યાં સુધી કંપનીના ગેઇટ ઉપર જ ઉભા રહી પોતાનો વિરોધ નોંધાવ્યો હતો. વિદેશી કંપની દ્વારા ધારાસભ્યની રજૂઆત પણ કાને ન ધરાતા કરાયેલ વિરોધ પ્રદર્શનની વાત ભાજપી કાર્યકરોને થતાં ૨૦થી વધુ પણ કંપની ગેઇટ ઉપર પહોંચી ગયા હતા અને ધારાસભ્યના સમર્થનમાં ઉભા રહ્યા હતા.
આ અંગેની વાતચીતમાં ધારાસભ્ય દુષ્યંત પટેલે જણાવ્યું હતું કે, આ રીતે અચાનક ગુજરાતી કર્મચારીઓને એક દિવસની નોટીસ આપી અચાનક છુટા કરી દેવાની આ વિદેશી કંપની ઇનઓસ સ્ટાયલોલ્યુશન ઇન્ડિયા લિમિટેડની નીતિ ખોટી છે. આ બાબતે સરકારમાં પણ રજૂઆત કરવામાં આવશે અને જો કંપની સતાધીશો આ બાબતે યોગય બાંહેધારી નહીં આપે તો આગામી દિવસોમાં કંપની સામે આંદોલન કરાશેનું જણાવ્યું હતું.
તો બીજી તરફ ઘટનાની જાણ વાગરા ધારાસભ્ય અરૂણસિંહ રણાને થતાં તેઓ પણ તુરંત દહેજ ખાતે દોડી આવ્યા હતા અને તેમણે કંપની સત્તાધિશો સાથે બેઠક કરી હતી. આ લખાય છે ત્યાં સુધી બંન્નેવ ધારાસભ્યઓની કંપની સાથે બેઠક ચાલુ છે.
