જાહ્નવી કપૂરે 'મિસ્ટર એન્ડ મિસિસ' ક્રિકેટ કેમ્પની ઝલક શેર કરી

બોલિવૂડ એક્ટ્રેસ જાહ્નવી કપૂર સોશિયલ મીડિયા પર ઘણી એક્ટિવ રહે છે. તે અવારનવાર ફેન્સ સાથે તેની આવનારી ફિલ્મો વિશે અપડેટ્સ શેર કરતી રહે છે. હવે પ્રજાસત્તાક દિવસના અવસર પર, તેણે તેની આગામી ફિલ્મ મિસ્ટર એન્ડ મિસિસના ક્રિકેટ કેમ્પની એક ઝલક શેર કરી છે.

આ તસવીરો જાહ્નવીએ તેના ઓફિશિયલ ઈન્સ્ટાગ્રામ હેન્ડલ પર શેર કરી છે. તસવીરોમાં, અભિનેત્રી ભારતીય ક્રિકેટર દિનેશ કાર્તિક સાથે જોવા મળે છે, જ્યાં તે દિનેશ કાર્તિક પાસેથી બેટિંગ કુશળતાની તાલીમ લઈ રહી છે. પ્રથમ તસવીરોમાં અભિનેત્રી ક્રિકેટ હેલ્મેટ પહેરેલી જોવા મળે છે, જ્યારે અન્ય તસવીરોમાં જાહ્નવી કપૂર ફિલ્મની ટીમ સાથે બેઠેલી જોવા મળે છે અને દિનેશ બેટિંગની પ્રેક્ટિસ કરે છે. સોશિયલ મીડિયા પર આ તસવીરો સામે આવ્યા બાદ એવી અટકળો વહેતી થઈ છે કે અભિનેત્રી મિસ્ટર એન્ડ મિસિસ ફિલ્મમાં મહિલા ક્રિકેટરની ભૂમિકામાં જોવા મળી શકે છે. એક તસવીરમાં અભિનેત્રીને ક્રિકેટ કીટ પણ પેક કરતી જોઈ શકાય છે. આ તસવીરો ઈન્સ્ટાગ્રામ પર શેર કરતાં અભિનેત્રી જાહ્નવી કપૂરે કેપ્શન આપ્યું, ક્રિકેટ કેમ્પ મિસ્ટર એન્ડ મિસિસ. તમને જણાવી દઈએ કે, આ ફિલ્મની જાહેરાત કરણ જોહરે ગયા વર્ષે નવેમ્બરના અંતમાં પોતાના ઈન્સ્ટાગ્રામ પર એક વીડિયો શેર કરીને કરી હતી. આ જાહેરાત બાદ લોકોને ખ્યાલ આવ્યો કે આ ફિલ્મ ક્રિકેટ પર આધારિત છે. કારણ કે કરણે શેર કરેલા વીડિયોમાં ક્રિકેટની કોમેન્ટ્રી સાંભળવા મળી રહી હતી. વીડિયોની શરૂઆતમાં રાજકુમાર અને જાહ્નવી કપૂરનો અવાજ પણ સંભળાય છે, જેમાં તેઓ કહે છે કે સપનાને પૂરા કરવા માટે ક્યારેક બે લોકોની જરૂર પડે છે.