• માળીયા હાટીના ગામના યુવક સાથે થઈ છેતરપિંડી

• ઝાંસીની યુવતીએ યુવકને આપી હતી લગ્નની લાલચ

• 10 લાખના દાગીના, 3.50 લાખ રોકડ લઈ ફરાર થઈ

• પોલીસે લૂંટેરી દુલ્હનની અટકાયત કરી તપાસ આદરી

• યુવતીએ 5 જેટલા યુવકોને બનાવ્યા શિકાર : પોલીસ

જુનાગઢ જિલ્લાના માળીયા હાટીના ગામના યુવકને ઝાંસીની યુવતીએ લગ્નની લાલચ આપી રૂ. 10 લાખના દાગીના અને 3.50 લાખ રોકડ રકમ લઈ ફરાર થઈ જતા સમગ્ર મામલો પોલીસ મથકે પહોચ્યો છે.

જુનાગઢના માળિયા હાટીના ખાતે રહેતા અમિત પંડ્યા નામના યુવક સાથે લગ્ન કરવાની લાલચ આપી ઝાંસીની રોશની જવાહર નામની યુવતીએ યુવકને ફસાવ્યો હતો. ગત મે માસમાં યુવકને વિશ્વાસમાં લઈ યુવતી તેના ઘરે રહેવા આવી હતી, જ્યાં યુવકે સોનાના ઘરેણા બનાવડાવી આપ્યા હતા, આ સાથે જ યુવકે રોકડ રકમ પણ ઘરમાં રાખી હતી. જોકે, યુવક જુનાગઢ ખાતે કામ અર્થે જતાં યુવતી રૂ. 10 લાખના દાગીના અને 3.50 લાખ રોકડ રકમ લઈ ઝાંસી જતી રહી હતી.

જેમાં તેણીએ ફરી સંપર્ક કરતા યુવકને ઝાંસી બોલાવ્યો હતો, જ્યાં લગ્ન માટે કહેતા ઉત્તરાખંડના ત્રિયુગીનારાયણ મંદિરે લઈ જઈ હારતોરા કર્યા હતા. ત્યારબાદ ત્યાંથી યુવતીને પોતાના પરિવારને મળવા નહીં દઈ યુવક યુવતીને પરત માળિયા હાટીના લઈ આવ્યો હતો. જોકે, યુવકને હવે લગ્ન નહી કરે તેવું જણાતા વારંવાર ઘરેણા અને રોકડ પરત કરવા માંગ કરી હતી. આથી યુવતીએ તેના સાથે મારપીટ કરી છરી બતાવી જાનથી મારી નાખવાની ધમકી આપી હોવાનો વિડિયો પણ બનાવ્યો હતો.

સમગ્ર મામલે યુવકે ગત મે મહિનામાં જ પોલીસ મથકે અરજી કરી હતી. જે પછી ફરિયાદ પણ નોંધાવી હતી. આ અંગે ડીવાયએસપીએ જણાવ્યું હતું કે, આ યુવતીએ 5 જેટલા યુવકોને શિકાર બનાવી લૂંટ ચલાવી છે, ત્યારે હાલ તો પોલીસે લૂંટેરી દુલ્હનની અટકાયત કરી વધુ તપાસ હાથ ધરી છે.