વલસાડ : રૂ. 2.78 કરોડના ખર્ચે ડોર-ટુ-ડોર વેસ્ટ કલેક્શન વાહનોની 47 ગ્રામ પંચાયતોમાં ફાળવણી કરાશે..

નાણા, ઉર્જા અને પેટ્રોકેમિકલ્સ મંત્રી કનુ દેસાઈના અધ્યક્ષ સ્થાને તા. ૧૫મી જૂનના રોજ વલસાડ જિલ્લાના વલસાડ તાલુકાના સ્વામિનારાયણ મંદિર, તિથલના પટાંગણમાં કેન્દ્ર સરકારની ૮ વર્ષની ઉપલબ્ધિઓ, ગરીબ કલ્યાણ અને સેવા સુશાસન અંતર્ગત કેન્દ્ર સરકારની ફ્લેગશીપ યોજના અન્વયે કાર્યક્રમનું આયોજન કરવામાં આવ્યું છે.

આ કાર્યક્રમમાં મંત્રી કેન્દ્ર સરકારની ફ્લેગશીપ યોજનાના લભાર્થીઓને લાભો એનાયત કરશે. તેમજ રાજ્યમંત્રીના હસ્તે જિલ્લાની ૪૭ ગ્રામ પંચાયતો માટે ૧૫માં નાણાંપંચની જિલ્લા અને તાલુકા કક્ષાની ગ્રાંટમાંથી રૂપિયા ૨.૭૮ કરોડની કિંમતની ડોર-ટુ-ડોર વેસ્ટ કલેક્શન વાહનોને લીલી ઝંડી આપી પ્રસ્થાન કરાવશે. ઈ-વિહીકલ અને છોટા હાથી ટેમ્પો આ ડોર-ટુ-ડોર વેસ્ટ કલેક્શન ગાડીઓ તરીકે કામગીરી કરશે. રાજ્યમંત્રીના હસ્તે જિલ્લાના 3 ગ્રામ સખી સંઘોને કુલ રૂ.૨૧ લાખ અને ૫(પાંચ) સ્વ સહાય જૂથોને રૂ. ૧.૫ લાખના ચેકોનું પણ વિતરણ કરશે.