આંધ્રપ્રદેશ-કેરળ અને તમિલનાડુમાં ભારે વરસાદને કારણે તબાહી, વડાપ્રધાન નરેન્દ્ર મોદીએ કર્ણાટકના સીએમ સાથે કરી વાત

વડાપ્રધાન નરેન્દ્ર મોદીએ દક્ષિણ કર્ણાટકમાં ભારે વરસાદની સ્થિતિનો તાગ મેળવ્યો હતો. અહેવાલ મુજબ, પીએમ મોદીએ રાજ્યમાં ભારે પરિસ્થિતિનો સામનો કરવા માટે મુખ્યમંત્રી બસવરાજ બોમાઈ સાથે વાત ચીત કરી હતી. બીજી તરફ આંધ્રપ્રદેશમાં પણ ભારે વરસાદને કારણે સ્થિતિ સારી નથી. આંધ્ર પ્રદેશ સરકારે ચિત્તૂર, નેલ્લોર, કુડ્ડાપાહ અને અનંતપુર જિલ્લામાં પૂરની સ્થિતિ પર સમીક્ષા બેઠક બાદ લોકોને ખાદ્યપદાર્થો વિતરણ કરવાનો નિર્ણય લીધો છે. રાજ્ય સરકારે તમામ પૂરગ્રસ્ત પરિવારોને 25 કિલો ચોખા, 1 કિલો ચણાની દાળ, તેલ, ડુંગળી અને બટાકાનું વિતરણ કરવાનો નિર્ણય લીધો છે. આ તમામ ખાદ્યપદાર્થો તમામ પૂર અસરગ્રસ્ત પરિવારોને વિનામૂલ્યે આપવામાં આવશે.

દક્ષિણના રાજ્યોમાં ભારે વરસાદનો કહેર અટકવાનું નામ નથી લઈ રહ્યો. ભારે વરસાદને કારણે કર્ણાટકની રાજધાની બેંગલુરુમાં તળાવો ઉભરાઈ ગયા છે અને અનેક ઘરોમાં પાણી ઘૂસી ગયા છે. તે જ સમયે, તમિલનાડુના ઘણા ભાગોમાં વરસાદને કારણે આવેલા પૂરને કારણે ઘણું નુકસાન થયું છે. હવામાન વિભાગના નવીનતમ અપડેટ મુજબ, તમિલનાડુમાં યલો એલર્ટ જારી કરવામાં આવ્યું છે. આગામી કેટલાક દિવસો સુધી અહીં ભારે વરસાદની આગાહી કરવામાં આવી છે. ભારતીય હવામાન વિભાગ (IMD) એ તામિલનાડુ માટે 23 અને 24 નવેમ્બર માટે યલો એલર્ટ અને 25-26 નવેમ્બર માટે ઓરેન્જ એલર્ટ જાહેર કર્યું છે.

IMDએ કહ્યું, 'બંગાળની ખાડીની દક્ષિણપૂર્વ પર ચક્રવાતી પરિભ્રમણ છે. આગામી 4-5 દિવસ દરમિયાન તે પશ્ચિમ-ઉત્તરપશ્ચિમ તરફ તમિલનાડુ કિનારા તરફ આગળ વધે તેવી સંભાવના છે. હવામાનની આગાહી મુજબ ચક્રવાતી પરિભ્રમણથી દક્ષિણપૂર્વ બંગાળની ખાડી અને તમિલનાડુના કાંઠા સુધી વિસ્તરી રહી છે.

IMD એ આગામી 5 દિવસ દરમિયાન કર્ણાટક, કેરળ-માહે તમિલનાડુ, પુડુચેરી અને કરાઈકલમાં હળવા વરસાદની ચેતવણી આપી છે. IMDએ કહ્યું કે આગામી 5 દિવસ દરમિયાન તમિલનાડુ, પુડુચેરી અને કરાઈકલમાં વરસાદની સંભાવના છે. 25 અને 26 નવેમ્બરે કેરળ અને માહેમાં છૂટાછવાયા સ્થળોએ ભારે વરસાદની સંભાવના છે. 25 નવેમ્બરે તમિલનાડુ, પુડુચેરી અને કરાઈકલમાં પણ ભારે વરસાદની શક્યતા છે.