IPL 2022: સનરાઇઝર્સની સતત ત્રીજી જીત, માર્કરામ-ત્રિપાઠી રહ્યા હીરો

સનરાઇઝર્સ હૈદરાબાદ (SRH) એ ઇન્ડિયન પ્રીમિયર લીગ (IPL)ની વર્તમાન સિઝનમાં સતત ત્રીજી જીત નોંધાવી છે. કેન વિલિયમસન બ્રિગેડે શુક્રવારે રમાયેલી મેચમાં કોલકાતા નાઈટ રાઈડર્સ (KKR) ને સાત વિકેટે હરાવ્યું હતું. સનરાઇઝર્સ ટીમની જીતનો હીરો યુવા બેટ્સમેન રાહુલ ત્રિપાઠી રહ્યો હતો. ટાર્ગેટનો પીછો કરવા ઉતરેલી સનરાઇઝર્સ હૈદરાબાદની શરૂઆત ખરાબ રહી હતી અને 39 રનના સ્કોર પર બે વિકેટ ગુમાવી દીધી હતી. કેન વિલિયમસન 17 અને અભિષેક શર્મા 3 રન બનાવીને આઉટ થયા હતા. બે વિકેટ પડ્યા બાદ રાહુલ ત્રિપાઠી અને એડન માર્કરામે ત્રીજી વિકેટ માટે 94 રનની ભાગીદારી કરીને મેચને સનરાઇઝર્સ તરફ વાળ્યો હતો.

રાહુલ ત્રિપાઠીએ માત્ર 37 બોલમાં 71 રન બનાવ્યા જેમાં 6 છગ્ગા અને 4 ચોગ્ગા સામેલ હતા. તે જ સમયે એડન માર્કરામે અણનમ 68 રન બનાવ્યા. જેમાં 6 ચોગ્ગા અને 4 છગ્ગાનો સમાવેશ થાય છે. માર્કરમે મેચનો અંત સિક્સર સાથે કર્યો હતો. કોલકાતા તરફથી આન્દ્રે રસેલે બે અને પેટ કમિન્સે એક વિકેટ લીધી હતી. ટોસ હાર્યા બાદ પ્રથમ બેટિંગ કરતા કોલકાતા નાઈટ રાઈડર્સે આઠ વિકેટે 175 રન બનાવ્યા હતા. નીતિશ રાણાએ સૌથી વધુ 54 રનનું યોગદાન આપ્યું હતું. રાણાની ઇનિંગમાં 6 ચોગ્ગા અને બે છગ્ગાનો સમાવેશ થાય છે. આન્દ્રે રસેલે પણ 25 બોલમાં ચાર છગ્ગા અને ચોગ્ગાની મદદથી અણનમ 49 રનની ઇનિંગ રમી હતી. સનરાઇઝર્સ હૈદરાબાદ તરફથી ટી. નટરાજને સૌથી વધુ ત્રણ અને ઉમરાન મલિકે બે ખેલાડીઓને આઉટ કર્યા હતા.