કાઉન્ટી ક્રિકેટમાં પૃથ્વી શૉની ધમાલ, ODIમાં બેવડી સદી ફટકારી..!

ખરાબ ફોર્મના કારણે ટીમ ઈન્ડિયાની બહાર ચાલી રહેલા પૃથ્વી શોએ કાઉન્ટી ક્રિકેટમાં બેવડી સદી ફટકારી છે. તેણે સમરસેટ સામે 153 બોલમાં 244 રનની શાનદાર ઈનિંગ રમી અને પોતાની ટીમને વિશાળ સ્કોર સુધી લઈ ગઈ. નોર્થમ્પટનશાયર તરફથી ઇનિંગની શરૂઆત કરનાર પૃથ્વી શૉ છેલ્લી ઓવરમાં લેમ્બના હાથે કેચ આઉટ થયો હતો. લગભગ આખી ઇનિંગ્સમાં બેટિંગ કરનાર શૉએ 28 ચોગ્ગા અને 11 છગ્ગા ફટકાર્યા હતા. તેણે 129 બોલમાં તેની બેવડી સદી પૂરી કરી અને ફોર્મમાં પરત ફરવાના સંકેતો દર્શાવ્યા. આ ઇનિંગમાં તેનો સ્ટ્રાઇક રેટ 159.48 હતો.

શૉ સિવાય વ્હાઇટમેને 54 રન બનાવ્યા હતા. ટીમને 415 રન સુધી પહોંચાડવામાં રિકાર્ડોએ 47 અને એમિલોએ 30 રનનું યોગદાન આપ્યું હતું. આ મેચમાં એક છેડે નોર્થમ્પટનશાયરની વિકેટો પડતી રહી અને શૉ બીજા છેડે બોલરોને મારતો રહ્યો. આ કારણે નોર્થમ્પટનશાયરની ટીમ આઠ વિકેટ ગુમાવી હોવા છતાં 415 રનના સ્કોર સુધી પહોંચી શકી હતી.