સુરત : 11 વર્ષના વિદ્યાર્થીને લઈને ભાગેલી 23 વર્ષની શિક્ષિકા 390 KM દૂરથી ઝડપાય, શિક્ષિકાનો ઇરાદો જાણવા પોલીસની મથામણ

• 23 વર્ષની શિક્ષિકાના 11 વર્ષના વિદ્યાર્થીને ભગાડી જવાનો મામલો

• ઘટનાના 4 દિવસ બાદ રાજસ્થાન બોર્ડર ઉપરથી બન્ને મળી આવ્યા

• શામળાજી પાસેથી પોલીસે વિદ્યાર્થી સાથે જ શિક્ષિકાને ઝડપી લીધી

• શિક્ષિકા અને વિદ્યાર્થીને સુરત ખાતે લાવી વધુ તપાસ હાથ ધરાય

• વિદ્યાર્થીને ભગાવી જવા પાછળનો ઇરાદો જાણવા પોલીસની મથામણ

સુરતમાં 23 વર્ષની એક શિક્ષિકા 11 વર્ષના વિદ્યાર્થીને ભગાડી જવાની ચકચારી ઘટના ચર્ચાસ્પદ બની છે. આ ઘટનાના 4 દિવસ બાદ રાજસ્થાન બોર્ડર પર શામળાજી પાસેથી પોલીસે શિક્ષિકાને ઝડપી લીધી છે, ત્યારે હાલ તો હાલ શિક્ષિકા અને વિદ્યાર્થીને સુરત ખાતે લાવી વધુ તપાસ હાથ ધરવામાં આવી છે.

સુરત શહેરના પુણા વિસ્તારમાં રહેતો અને પાંચમા ધોરણમાં અભ્યાસ કરતા કરિયાણાના વેપારીના 11 વર્ષીય પુત્રને તેની નજીકના વિસ્તારમાં જ રહેતી તેની ટ્યૂશન-કમ-સ્કૂલ શિક્ષિકા ગત તા. 25 એપ્રિલ-2025ની બપોરે ભગાડી ગઇ હતી. વિદ્યાર્થી અને શિક્ષિકાનો પત્તો મેળવવાના ઇરાદે પોલીસે 4 ટીમ બનાવી હતી. આ દરમિયાન શિક્ષિકાનો મોબાઈલ ફોન સુરત રેલવે સ્ટેશન પાસેથી બંધ થયો હોય, તેઓ ટ્રેન અથવા તો નજીકમાં આવેલ સરકારી બસ સ્ટેશનથી બસ મારફતે ક્યાંક ગયાં હોવાની પ્રબળ આશંકા સાથે પોલીસે જોરશોરથી તપાસ શરૂ કરી હતી.

આખી રાત CCTV ફૂટેજ ફંફોળ્યા બાદ પણ પોલીસને સુરત રેલવે સ્ટેશન કે, બસ સ્ટેશન પર આ શિક્ષિકા અને વિદ્યાર્થી બેસતાં નહિ દેખાતાં પોલીસ ચકરાવે ચઢી હતી. જોકે, સોસાયટીના CCTV ફૂટેજ ચેક કરતાં આ બાળકને તેની શિક્ષિકા સાથે લઈ જતી હોવાનું અને તેના ખભા પર એક બેગ પણ નજરે પડ્યું હતું. છેલ્લા 4 દિવસથી શિક્ષિકા અને વિદ્યાર્થી બંને બસમાં સફર કરીને સુરતથી 390 કિમીથી પણ વધુ દૂર પહોંચી ગયા હતા. પ્રાથમિક પૂછપરછમાં જાણવા મળ્યું હતું કે, શિક્ષિકા અને વિદ્યાર્થી બન્ને છેલ્લાં 3 વર્ષથી એકાબીજાને ઓળખે છે.

બન્નેના પરિવારજનો પણ એકબીજાના પરિવારને ઓળખે છે, અને સંપર્કમાં પણ છે. વિદ્યાર્થી આ શિક્ષિકા પાસે છેલ્લાં 3 વર્ષથી ટ્યૂશન જતો હતો. પહેલાં 3 વિદ્યાર્થી હતા, જ્યારે છેલ્લા એક વર્ષથી આ એક જ વિદ્યાર્થી તેના ઘરે ટ્યૂશન માટે જતો હતો. જેથી બન્ને એકબીજાને પસંદ પણ કરવા લાગ્યા હતા. તો બીજી તરફ, શિક્ષિકાની ઉંમર 23 વર્ષ થઈ ગઈ હોવાથી પરિવારજનો લગ્ન માટે કહી રહ્યાં હતાં, અને પરિવારજનોએ ઠપકો પણ આપ્યો હતો.

આ સાથે વિદ્યાર્થીને પણ પરિવારજનો અભ્યાસ માટે ઠપકો આપતા હતા. આ દરમિયાન શિક્ષિકાએ ભાગી જવા માટે તમામ તૈયારીઓ કરી લીધી હતી. 11 વર્ષીય વિદ્યાર્થી છેલ્લાં ત્રણ વર્ષથી 23 વર્ષીય શિક્ષિકા પાસે ટ્યૂશન જતો હતો. અગાઉ ત્યાં કુલ 3 વિદ્યાર્થી ભણવા આવતા હતા. પણ છેલ્લા એક વર્ષથી તે એકલો જ ભણતો હતો. અત્રે ઉલ્લેખનીય છે કે, આ અજીબ ઘટના સુરત શહેરમાં ચર્ચાસ્પદ બની છે. વિદ્યાર્થીને ભગાવી જવા પાછળનો ઇરાદો શું હતો, તે જાણવા પોલીસ મથી રહી છે.