કોરોના નિયમોમાં છૂટછાટ બાદ આંતરરાષ્ટ્રીય મુસાફરોને આજથી એરપોર્ટ પર આ બાબતોથી મળી રાહત

ભારત સહિત વિશ્વમાં કોરોના વાયરસના કેસમાં ઘટાડો જોવા મળી રહ્યો છે. જેના કારણે કોવિડ સંબંધિત પ્રતિબંધોને હળવા કરવાની કવાયત શરૂ થઈ ગઈ છે. આવી સ્થિતિમાં ભારતે વિદેશથી આવતા પ્રવાસીઓને પણ મોટી રાહત આપી છે. આંતરરાષ્ટ્રીય પ્રવાસીઓ માટે બનાવેલા નવા નિયમો હેઠળ, લોકોએ હવે વિદેશથી આગમન પર સાત દિવસ સુધી ક્વોરેન્ટાઇનમાં રહેવાની જરૂર રહેશે નહીં. આ સિવાય આંતરરાષ્ટ્રીય મુસાફરોને એરપોર્ટ પર ફરજિયાત કોવિડ ટેસ્ટિંગમાંથી પણ મુક્તિ આપવામાં આવશે.

આરોગ્ય મંત્રાલયે તાજેતરમાં આંતરરાષ્ટ્રીય પ્રવાસીઓ માટે તેની માર્ગદર્શિકામાં સુધારો કર્યો છે. આંતરરાષ્ટ્રીય પ્રવાસીઓએ હવે સાત દિવસ સુધી હોમ ક્વોરેન્ટાઇનમાં રહેવાની જરૂર નથી અને આઠમા દિવસે RT-PCR ટેસ્ટ કરાવવાની જરૂર નથી. વિદેશથી એરપોર્ટ પર આવતા તમામ મુસાફરોમાંથી, કુલ મુસાફરોમાંથી બે ટકાની કોવિડ માટે તપાસ કરવામાં આવી રહી છે. આ દરમિયાન લોકોના સેમ્પલ લેવામાં આવી રહ્યા છે અને પછી તેમને એરપોર્ટની બહાર જવા દેવામાં આવી રહ્યા છે. કોવિડ સર્ટિફિકેટની દિશામાં મુસાફરોને પણ મોટી રાહત આપવામાં આવી છે. હવે મુસાફરો એર સુવિધા પોર્ટલ પર નેગેટિવ RT-PCR રિપોર્ટ અપલોડ કરી શકશે.

આ ઉપરાંત રસીકરણ પ્રમાણપત્ર અપલોડ કરવાની સુવિધા પણ આપવામાં આવી છે. વિદેશથી આવતા પ્રવાસીઓએ હવે હોમ ક્વોરેન્ટાઈનને બદલે ભારતમાં આગમન પર 14 દિવસ સુધી તેમના સ્વાસ્થ્યનું સ્વ-નિરીક્ષણ કરવું પડશે. જો કોઈ પેસેન્જર પહોંચ્યા પછી સ્ક્રિનિંગ દરમિયાન સંક્રમિત જોવા મળે છે અથવા જો તે ચેપના લક્ષણો દર્શાવે છે, તો તેને તરત જ આઈસોલેટ કરવામાં આવશે. આ પછી યાત્રીને હેલ્થ પ્રોટોકોલ મુજબ હોસ્પિટલ લઈ જવામાં આવશે. ચેપગ્રસ્ત પ્રવાસીના સંપર્કમાં આવેલા લોકોની પણ ઓળખ કરવામાં આવશે.