વાલિયા પંથકમાં સતત બીજા દિવસે સાર્વત્રિક વરસાદ

૧૯ કલાકમાં અઢી ઇંચ વરસાદ

ચોમાસુ જામતા ખેડૂતોમાં આનંદ છવાયો

વાલિયા તાલુકામાં સતત બીજા દિવસે પણ સાર્વત્રિક વરસાદ ખાબકતા ખેડૂતોમાં આનંદની લાગણી જોવા મળી હતી.

ભરૂચ જિલ્લામાં બુધવારે પણ વરસાદી વાતાવરણ યથાવત રહેવા પામ્યું હતું જેમાં વાલિયા પંથકમાં મંગળવારની સવાર બાદ કરતા મંગળવારની સાંજથી બુધવારે એટલે કે સતત બીજા દિવસે પણ સાર્વત્રિક વરસાદ વરસ્યો હતો. ઝરમર ઝરમર શરૂ થયેલ વરસાદ બુધવારના રોજ પણ યથાવત રહેતા વાલિયા પંથકમાં બધુવારે ૧૨ વાગ્યા સુધી અઢી ઇંચ વરસાદ નોંધાયો હતો.

આ વરસાદને પગલે કેટલાક સ્થળે જળબંબાકારની પરિસ્થિતિનું નિર્માણ થયું હતું તો બીજી તરફ વાલિયા તાલુકામાં ચોમાસુ જામતા ખેડૂતો આનંદિત થઇ ઉઠયા છે. ઉલ્લેખનીય છે કે, આગામી ૪૮ કલાકમાં રાજ્યમાં ભારે વરસાદની આગાહી પણ કરવામાં આવી છે.