ભરૂચ : ઝગડિયાના ગોવાલી ગામે જુગાર રમતા બે જુગારીઓને 1.54 લાખથી વધુના મુદ્દામાલ સાથે ઝડપી પડ્યા
ભરૂચ જિલ્લાના ઝઘડિયા તાલુકાના ગોવાલી ગામમાંથી જુગાર રમતા બે ઇસમોને મુદ્દામાલ સાથે ઝઘડિયા પોલીસે ઝડપી પાડ્યા હતા.
મળતી માહિતી મુજબ, ઝઘડિયા તાલુકાના ગોવાલી ગામમાં આવેલા મહાકાળી નગર સામે હનુમાન મંદિરના ઓટલા ઉપર બેસી જુગાર તેમજ આંક ફરકના આંકડા લખી રહેલા બે ઇસમોને ઝઘડિયા પોલીસે ઝડપી પાડ્યા હતા.
પોલીસ સૂત્રોના જણાવ્યા મુજબ ઝઘડિયા પોલીસ મથકના પોલીસ ઇન્સ્પેક્ટર પી. એચ. વસાવા સ્ટાફના માણસો સાથે ખરચી આઉટ પોસ્ટ વિસ્તારમાં પેટ્રોલીંગમાં હતા. તે દરમિયાન બાતમી મળી હતી કે બે ઇસમો મહાકાળી નગર હનુમાન મંદિરના ઓટલા ઉપર બેસી આંક ફરકના આંકડા લખી સટ્ટા બેટિંગ તેમજ જુગાર રમાડી રહ્યા છે. પોલીસે ઉપરોક્ત સ્થળે રેઇડ કરતા નીતિન વિનાયક માધવરાવ આબનાવી (મરાઠા) તેમજ સાદિક અબ્દુલ મજીદ મલેકને ઝડપી પાડી તેઓ પાસેથી રોકડ રકમ, ત્રણ મોબાઇલ તેમજ રીક્ષા મળી કુલ રૂપિયા 1,54,480ના મુદ્દામાલ કબજે કરી બન્ને ઇસમો વિરૂધ્ધ ઝઘડિયા પોલીસ મથકમાં ગુનો દાખલ કરી કાયદેસર કાર્યવાહી હાથ ધરી હતી.