• શુક્લતીર્થ ગામે 7 દિવસીય ભાતીગળ મેળાનું આયોજન

• કારતકી અગિયારસના દિવસથી મેળાનો કરાશે પ્રારંભ

• ગ્રામ પંચાયત અને વહીવટી તંત્ર દ્વારા તૈયારીઓને ઓપ

• ખાણીપીણીના સ્ટોલ સહિત વિવિધ રાઈડ મેળાનું આકર્ષણ

• રાજ્યમાંથી લાખોની સંખ્યામાં લોકો મેળો મહાલાવા ઉમટશે

ભરૂચથી17 કિલોમીટરના અંતરે આવેલ શુક્લતીર્થ ગામ ખાતે કારતકી અગિયારસના દિવસથી 7 દિવસીય ભાતીગળ મેળાનું આયોજન કરવામાં આવ્યું છે, ત્યારે શુક્લતીર્થ ગ્રામ પંચાયત તેમજ વહીવટી તંત્ર દ્વારા મેળાની તૈયારીઓને અંતિમ ઓપ આપવામાં આવી રહ્યો છે.

ભરૂચ તાલુકાના શુકલતીર્થ ખાતે તા. 12 નવેમ્બરથી યોજનારભાતીગળ મેળાને અનુલક્ષીને તડામાર તૈયારીઓ શુકલતીર્થ પંચાયત દ્વારા શરૂ કરી દેવામાં આવી છે. મેળા દરમ્યાન પંચાયત દ્વારા 600થી વધુ પ્લોટોની ફાળવણી કરી લાઈટ, પાણી, સીસીટીવી કેમેરા સહિતની સુવિધાઓ પૂરી પાડવામાં આવનાર છે. મેળામાં ચગડોળ સહિતના મનોરંજનના સાધનોની કામગીરી પણ પૂરજોશમાં ચાલી રહી છે. મેળાની મજા માણવા રાજ્યભરમાંથી લોકો ઉમટી પડશે, ત્યારે શુકલતીર્થ ગ્રામ પંચાયત અને વહીવટી તંત્ર દ્વારા ભાતીગળ મેળાની તૈયારીઓને અંતિમ ઓપ આપવામાં આવી રહ્યો છે.

શુકલતીર્થગામે કારતક સુદની કારતકી અગિયારસના દિવસથી પૌરાણિક જાત્રાને લઇ તંત્ર દ્વારા તૈયારીઓ શરૂ કરી દેવામાં આવી છે. શુકલતીર્થ ગામમાં સ્વયંભૂ વિષ્ણુ ભગવાનની પ્રતિમા તેમજ શુકલેશ્વર મહાદેવનું પૌરાણિક મંદિર આવેલું છે. એક પટકથા અનુસાર, ભગવાન શ્રી હરિ સવારે બાળક અવસ્થામાં, બપોરે યુવા અવસ્થા તેમજ સાંજે વૃદ્ધ અવસ્થામાં ભક્તોને દર્શન આપે છે. આજે પણ આ મૂર્તિમાં 3 અવસ્થામાં ભગવાન દર્શન આપતા હોવાની માન્યતા છે. દર કારતક સુદ પુનમના રોજ ભગવાન વિષ્ણુનો જન્મ દિવસ હોવાથી શુકલતીર્થમાં ભવ્ય ભાતીગળ મેળો યોજાય છે. તો બીજી પટકથા અનુસાર, રાજા ચાણક્યને ઉમાપતિની આરાધના કર્યા બાદ શુકલતીર્થ ખાતે મોક્ષની પ્રાપ્તિ થઈ હતી. આ સ્થળે પાતાળમાંથી સ્વયંભુ શિવલિંગ પ્રગટ થયું હતું, જે આજે શુકલેશ્વર મહાદેવ તરીકે જાણીતું છે.

ભરૂચ તાલુકાના શુક્લતીર્થ ખાતે મેળાના પગલે લોકોમાં અનેરો ઉત્સાહ જોવા મળ્યો છે, ત્યારે અહી મોજ અને મજા માટે આવતા લોકો માટે ખાણીપીણી સહિત બાળકો માટે રમકડાં તેમજ ઘર વપરાશની ચીજવસ્તુઓના સ્ટોલ પણ ઉભા કરવામાં આવ્યા છે, ત્યારે સ્ટોલ મારફતે અનેક લોકો રોજગારી મેળવી પોતાનું ગુજરાન ચલાવી રહ્યા છે.

ભરૂચથી 17 કિલોમીટર દૂર આવેલા શુક્લતીર્થ ગામે કારતકી અગિયારસના દિવસથી 7 દિવસ ભાથીગળ મેળો ભરાય છે. જેમાં સમગ્ર રાજ્યમાંથી લાખોની સંખ્યામાં લોકો મેળાને મહાલાવા ઉમટી પડે છે. ઉલ્લેખનીય છે કે, આ મેળામાં આજુબાજુના ગામોમાંથી લોકો ટેન્ટ બાંધીને 5 દિવસ પોતાના પરિવાર સહિત મેળાની મજા માણવાની સાથે સંયુક્ત કુટુંબની ભાવનાનું ઉત્તમ ઉદાહરણ પણ પૂરું પાડે છે.