સુપ્રીમ આદેશ: રાજદ્રોહની કલમ 124A પર પ્રતિબંધ, કોઈ નવો કેસ નોંધાશે નહીં, જેલમાં રહેલા લોકો માંગી શકશે જામીન

સુપ્રીમ કોર્ટે બુધવારે મહત્વનો નિર્ણય આપતાં રાજદ્રોહ અધિનિયમની કલમ 124A પર રોક લગાવી દીધી છે. તેના હેઠળ દાખલ કરાયેલા તમામ પેન્ડિંગ કેસો પર પણ સુપ્રીમ કોર્ટે સ્ટે લગાવી દીધો છે. કોર્ટે કેન્દ્ર સરકારને કાયદા પર પુનર્વિચાર કરવાનો નિર્દેશ આપ્યો છે. સ્પષ્ટપણે કહેવામાં આવ્યું છે કે આ કલમ હેઠળ કોઈ નવો કેસ નોંધવામાં આવશે નહીં અને આ હેઠળ જેલમાં રહેલા લોકો કોર્ટમાંથી જામીન માંગી શકશે.

સર્વોચ્ચ અદાલતે, કેન્દ્ર અને રાજ્યોને IPCની કલમ 124Aમાં સુધારો કરવાની મંજૂરી આપતાં કહ્યું કે જ્યારે આ કામ પૂર્ણ ન થાય, ત્યારે આ કલમ હેઠળ કોઈ નવો કેસ દાખલ કરવો જોઈએ નહીં. અગાઉ, રાજદ્રોહ કાયદાને પડકારતી અરજીઓ પર પણ બુધવારે સુનાવણી થઈ હતી. કેન્દ્ર તરફથી સોલિસિટર જનરલ તુષાર મહેતા હાજર થયા હતા.તેમની દલીલો રજૂ કરતાં તેમણે કહ્યું હતું કે કોગ્નિઝેબલ ગુનાની નોંધણી અટકાવવી યોગ્ય નથી. જો કે, આવા કેસોની તપાસ કરવા માટે એક જવાબદાર અધિકારી હોવો જોઈએ અને કેસ સાથે તેના સંતોષની ન્યાયિક સમીક્ષા થવી જોઈએ. તેમણે સર્વોચ્ચ અદાલતને કહ્યું કે જ્યાં સુધી રાજદ્રોહના પેન્ડિંગ કેસોનો સંબંધ છે, દરેક કેસની ગંભીરતા અલગ-અલગ હોય છે. કેટલાક કેસમાં આતંકવાદી કનેક્શન હોઈ શકે છે અને કેટલાકમાં મની લોન્ડરિંગ કનેક્શન હોઈ શકે છે. આખરે પેન્ડિંગ કેસો કોર્ટ સમક્ષ સબ-જ્યુડીસ છે અને આપણે કોર્ટ પર વિશ્વાસ રાખવો જોઈએ. કેન્દ્ર સરકાર દ્વારા સ્પષ્ટપણે કહેવામાં આવ્યું હતું કે રાજદ્રોહની જોગવાઈઓ પર પ્રતિબંધ મૂકતો કોઈપણ આદેશ પસાર કરવો અયોગ્ય રહેશે. આને બંધારણીય બેંચે યથાવત રાખ્યા છે.