રાજકોટ : રૂ. 40 લાખનું સોનું અને રોકડ લઈને જતાં હતા જેતપુરના વેપારી, જુઓ પછી અચાનક શું બન્યું..!
રાજકોટ જિલ્લાના જેતપુર શહેરના નાના ચોક નજીક સોની બજારમાં ધોળા દિવસે વેપારીની આંખમાં ચટણી નાખી તેના પાસેથી રૂપિયા 40 લાખના સોનાની લૂંટ ચલાવી 2 અજાણ્યા શખ્સો ફરાર થઈ ગયા હતા. બનાવની જાણ થતાં પોલીસ કાફલો દોડી આવી તપાસ કરતાં વેપારી પાસે રહેલા થેલામાં 700 ગ્રામ સોનું અને રૂપિયા 2 લાખની રોકડ રકમ હોવાનું જાણવા મળ્યું હતું.
મળતી માહિતી અનુસાર, જેતપુરમાં ચીમન વેકરીયા નામના હોલસેલના વેપારી પોતાના થેલામાં 700 ગ્રામ સોનું અને રૂપિયા 2 લાખની રોકડ રકમ લઈને તેઓની સોની બજારમાં આવેલી શ્રી હરિ ગોલ્ડ જ્વેલરીની દુકાન તરફ જવા પસાર થઈ રહ્યા હતા તે દરમ્યાન અચાનક 2 અજાણ્યા શખ્સોએ તેમના પર ચટણી ઉડાવી તેમના હાથમાં રહેલ થેલી ઝૂંટવીને ફરાર થઈ ગયા હતા.
બનાવની જાણ થતાં જ પોલીસ કાફલો ઘટના સ્થળે દોડી આવી વધુ તપાસ હાથ ધરી હતી.
ચીમન વેકરીયાએ જણાવ્યું હતું કે, પોતાના પાસે રહેલી થેલીમાં અંદાજે 40 લાખ રૂપિયાનું 700 ગ્રામ જેટલું સોનું અને 2 લાખ રૂપિયાની રોકડ રકમ પણ હતી, ત્યારે હાલ તો પોલીસે ઘટના સ્થળ સહિત આસપાસના CCTV ફૂટેજ મેળવી વધુ તપાસ શરૂ કરી છે.
