અંડર-19 વર્લ્ડ કપ ચેમ્પિયન ભારતીય ટીમ સ્વદેશ પરત ફરી, BCCI કરશે સન્માન

ભારતને પાંચમી વખત અંડર-19 વર્લ્ડ કપનો ખિતાબ જીતાડનારી ભારતીય ટીમ પોતાના દેશ પરત ફરી છે. ટીમ વેસ્ટ ઈન્ડિઝથી ફ્લાઈટ દ્વારા લાંબી મુસાફરી કરીને ભારત પહોંચી હતી. આ દરમિયાન ટીમ એમ્સ્ટરડેમ અને દુબઈ થઈને આજે સવારે બેંગલુરુ પહોંચી હતી. ખેલાડીઓ અને સ્ટાફ મંગળવારે જ અમદાવાદ જવા રવાના થશે, જ્યાં બુધવારે ભારતીય ક્રિકેટ કંટ્રોલ બોર્ડ (BCCI) દરેકનું સન્માન કરી શકે છે.

આ દરમિયાન અંડર-19ના ખેલાડીઓ અમદાવાદમાં હાજર વિરાટ કોહલી અને રોહિત શર્મા જેવા ભારતના સિનિયર ખેલાડીઓને પણ મળશે. સિનિયર ટીમ હાલમાં વેસ્ટ ઈન્ડિઝ સામે ત્રણ મેચની વનડે શ્રેણી રમી રહી છે. BCCIએ જાહેરાત કરી હતી કે વર્લ્ડ કપ જીતનાર દરેક ખેલાડીને 40 લાખ રૂપિયા અને સપોર્ટ સ્ટાફને 25 લાખ રૂપિયા આપવામાં આવશે. ICCએ અંડર-19 વર્લ્ડ કપમાં ભાગ લેનારી તમામ ટીમો માટે પ્રવાસની વ્યવસ્થા કરી હતી.

ભારતીય ક્રૂએ ઇકોનોમી ક્લાસમાં ઉડાન ભરી હતી, પરંતુ આના કારણે પ્રવાસ વધુ થકવી નાખે છે. નેશનલ ક્રિકેટ એકેડમીના વડા વીવીએસ લક્ષ્મણ પણ ભારતીય ટીમ સાથે વેસ્ટ ઈન્ડિઝમાં હતા. તેણે પસંદગીકારો અને પાંચ રિઝર્વ ખેલાડીઓ સાથે અલગથી પ્રવાસ કર્યો. આ પાંચ રિઝર્વ ખેલાડીઓને ત્યારે બોલાવવામાં આવ્યા જ્યારે ટૂર્નામેન્ટની વચ્ચે ભારતના પાંચ ખેલાડીઓ કોરોના સંક્રમિત જણાયા. તેમાં કેપ્ટન યશ ધુલ અને વાઇસ કેપ્ટન શેખ રાશિદનો સમાવેશ થાય છે. જો કે તેમ છતાં ટીમ ઈન્ડિયાનું ટૂર્નામેન્ટમાં પ્રદર્શન શાનદાર રહ્યું હતું અને ટીમે છમાંથી છ મેચ જીતી હતી.