સુરત : ચંદ્રયાનની લોંચિંગ સેરેમનીને વધાવવા સુરતની મહિલાઓએ બનાવી રંગોળી

આજે લોન્ચ થઈ રહેલ ચંદ્રયાન-2ની રંગોળી સુરત શહેરમાં તૈયાર કરવામાં આવી છે. ભારત માટે અતિ મહત્વકાંક્ષી ચંદ્રયાન-2ને ચંદ્ર ઉપર ઉતારવાની તૈયારી ઈસરોએ કરી લીધી છે. રિહર્સલ પણ થઈ ગયું છે, ત્યારે દેશ વિદેશના લોકોની નજર હવે હરિકોટા પર રહેશે. ત્યારે સુરત ખાતે સુરતી મહિલાએ ઈસરોને શુભેચ્છા પાઠવવા એક ખાસ રંગોળી બનાવી છે. જેને જોઇ લોકોને પહેલી નજરમાં ચંદ્રયાન-2ની ઝલક જોવા મળી રહી છે.

સુરતની રંગોલી આર્ટિસ્ટ અંજલી સાળુંકે અને તેમની ટીમે એક વિશાળ રંગોળી તૈયાર કરી છે. વૈજ્ઞાનિકોને ખાસ શુભેચ્છા પાઠવવા માટે સુરતના રંગોલી આર્ટિસ્ટ્સ દ્વારા આ રંગોળી તૈયાર કરવામાં આવી છે.24 કલાકની મહેનત બાદ 24 જેટલા રંગોની મદદથી 15 ફૂટ લાંબી અને 12 ફૂટ પહોળી રંગોળી તૈયાર કરી છે. ચંદ્રયાન-2ને લઇ દેશભરના લોકોમાં ભારે ઉત્સાહ જોવા મળી રહ્યો છે. ત્યારે સુરતના આર્ટિસ્ટેચંદ્રયાન-2ની રંગોળી બનાવી લોકોને આશ્ચર્યમાં મૂકી દીધા છે. ચંદ્રયાન-2ને લોન્ચ કરવામાં માત્ર ગણતરીના કલાકો બાકી છે. આ રંગોળીને જોઈ લોકો સેલ્ફી લઈ રહ્યા છે અને મોબાઈલમાં તસ્વીરો કેદ કરી રહ્યા છે. લોકો માટે આ ચંદ્રયાન-2ની રંગોળી ચર્ચાનો વિષય બની ગયું છે. રંગોળી જોવા માટે આવેલા લોકો ઇસરોના વૈજ્ઞાનિકોને શુભેચ્છા પાઠવી રહ્યા છે.