ગુરુવારે રૂપિયો યુએસ ચલણ ડોલર સામે 102 પૈસા ઘટીને 75.63 (કામચલાઉ) પર બંધ થયો હતો. રશિયાએ યુક્રેન સામે લશ્કરી કાર્યવાહી શરૂ કર્યા બાદ ઉચ્ચ જોખમ ધરાવતી મિલકતોને આંચકો લાગ્યો છે. ફોરેક્સ ટ્રેડર્સે જણાવ્યું હતું કે વિદેશી ભંડોળનો પ્રવાહ, સ્થાનિક ઇક્વિટીમાં ભારે વેચવાલી અને ક્રૂડ ઓઇલના ભાવમાં વધારો રોકાણકારોના સેન્ટિમેન્ટ પર અસર કરે છે.

ઇન્ટરબેંક ફોરેન એક્સચેન્જ માર્કેટમાં યુએસ ડોલર સામે રૂપિયો 75.02 પર ખૂલ્યો હતો, પરંતુ બાદમાં ડોલર સામે 75.75ની નીચી સપાટીએ ગયો હતો. ભારતીય રૂપિયો છેલ્લે 75.63 ના સ્તર પર બંધ થયો હતો, જે તેના પાછલા બંધ કરતાં 102 પૈસાના ઘટાડા સાથે હતો. દરમિયાન, છ ચલણ સામે ડૉલરની મજબૂતાઈને માપતો ડૉલર ઈન્ડેક્સ 0.74 ટકાના વધારા સાથે 96.90 પર ટ્રેડ થઈ રહ્યો હતો. ગ્લોબલ ઓઇલ બેન્ચમાર્ક બ્રેન્ટ ક્રૂડ ફ્યુચર્સ 8.36 ટકા વધીને બેરલ દીઠ $104.94 થયો હતો. HDFC સિક્યોરિટીઝના રિસર્ચ એનાલિસ્ટ દિલીપ પરમારે જણાવ્યું હતું કે ઓઇલ આયાતકારો તરફથી મહિનાના અંતે તેલની માંગને કારણે એશિયન કરન્સીમાં રૂપિયો સૌથી ખરાબ પ્રદર્શન કરનાર ચલણ બની ગયો છે. વધુમાં, યુક્રેન પર રશિયાના હુમલાને કારણે જોખમી અસ્કયામતોનું વેચાણ થયું હતું, જેના કારણે સેફ-હેવન ડૉલરની માંગમાં વધારો થયો હતો, એમ તેમણે જણાવ્યું હતું. બ્રેન્ટ ક્રૂડ ઓઈલના ભાવ પ્રતિ બેરલ 100 ડોલરને પાર કરી ગયા છે. તેની પાછળનું કારણ યુદ્ધને કારણે અનિશ્ચિતતાનું વાતાવરણ છે, જેણે રૂપિયા માટે સેન્ટિમેન્ટ બગાડ્યું છે. પરમારે જણાવ્યું હતું કે હાજર ડોલર-રૂપિયાને 74.30 પર સપોર્ટ મળ્યો હતો અને હવે તે 75.72ની એક મહિનાની ટોચ તરફ આગળ વધી રહ્યો છે.