ગુજરાતની જીવાદોરી સમાન નર્મદા જિલ્લામાં આવેલ સરદાર સરોવર નર્મદા ડેમની જળ સપાટી હાલ 123.30 મીટરથી વધુ નોંધાય છે, ત્યારે ભરઉનાળે 42 દિવસમાં જ સરદાર સરોવરના લાઇવ સ્ટોરેજમાં 68 હજાર કરોડ લિટર પાણીનો વધારો થવા પામ્યો છે.
ગુજરાતના દરવાજે ચોમાસું દસ્તક દઈ રહ્યું છે, ત્યારે ઉનાળામાં પણ ભારે ગરમી વચ્ચે પણ સરદાર સરોવર ડેમ રાહતના સમાચાર આપતો રહ્યો છે. નર્મદા કંટ્રોલ ઓથોરિટીના જણાવ્યા અનુસાર, હાલમાં સરદાર સરોવર ડેમમાં જળસપાટી 123.30 મીટરથી વધારે છે, અને પાણીનું લાઇવ સ્ટોરેજ 1,816 એમસીએમ એટલે કે, 1.81 લાખ કરોડ લિટર છે. અંદાજ મુજબ, આ પાણીનો જથ્થો રાજ્યની વસતીની પીવાના પાણીની જરૂરિયાત 6 મહિના સુધી નિભાવી શકે છે. જોકે, ભરઉનાળે ગરમીમાં આનંદ આપતા સમાચાર એ હતા કે, સરદાર સરોવરમાં પાણીની આવક ચાલું રહી છે. માત્ર 42 દિવસમાં જ સરદાર સરોવર નર્મદા ડેમના લાઇવ સ્ટોરેજમાં અંદાજે 68 હજાર કરોડ લિટર પાણીનો વધારો થયો છે. તો બીજી તરફ, સરદાર સરોવર સિવાયના રાજ્યના કુલ 206 જળાશયોમાં કુલ જળસંગ્રહ 4,932 મિલિયન ક્યુબિક મીટર નોંધાયો છે. જેની સામે સરદાર સરોવરમાં કુલ સંગ્રહ 5,530 મિલિયન ક્યુબિક મીટર છે. એટલે કે, રાજ્યના તમામ ડેમોમાં મળીને જેટલું પાણી છે, એનાથી પણ વધારે પાણીનો જથ્થો સરદાર સરોવર નર્મદા ડેમમાં નોંધાયો છે.