પીએમ મોદી 1 એપ્રિલે વિદ્યાર્થીઓ સાથે પરીક્ષા અંગે ચર્ચા કરશે, ટ્વિટ કરી આપી જાણકારી
ધોરણ 10 અને 12ની પરીક્ષાઓ સહિતની મહત્વની પરીક્ષાઓ પહેલા પીએમ મોદી ફરી એકવાર વિદ્યાર્થીઓને પરીક્ષા દરમિયાન તણાવ દૂર કરવા માટેનો મંત્ર આપતા જોવા મળશે. વિદ્યાર્થીઓ સાથેની આ ચર્ચા હવે 1 એપ્રિલે નવી દિલ્હીના તાલકટોરા સ્ટેડિયમમાં થશે. આમાં વિદ્યાર્થીઓની સાથે શિક્ષકો અને વાલીઓને પણ સામેલ કરવામાં આવશે.
કોરોનાની સ્થિતિમાં સુધારો આવ્યા બાદ શિક્ષણ મંત્રાલયે પહેલાની જેમ આ ચર્ચાનું આયોજન કરવાની જાહેરાત કરી છે. પીએમ નરેન્દ્ર મોદીએ ટ્વીટ કરીને કહ્યું કે ચાલો પરીક્ષાનો તહેવાર ઉજવીએ. સ્ટ્રેસ ફ્રી પરીક્ષાઓ વિશે વાત કરીએ. પરીક્ષા પર ચર્ચામાં 1 એપ્રિલે મળીશું. શિક્ષણ મંત્રાલયે ગુરુવારે વિદ્યાર્થીઓ સાથે PM મોદીની પરીક્ષા પે ચર્ચાની તારીખની જાહેરાત કરી હતી, જેમાં વિદ્યાર્થીઓ પહેલાની જેમ PM સાથે બેસીને પરીક્ષાઓ અને અભ્યાસ સંબંધિત વિષયો પર સીધા પ્રશ્નો પૂછી શકશે. વિદ્યાર્થીઓ સાથે પીએમ મોદીની પરીક્ષાની આ ચર્ચા 2018માં શરૂ થઈ હતી. ત્યારથી દર વર્ષે તેનું આયોજન કરવામાં આવે છે. આ ચર્ચા માટે નોંધણીની કામગીરી ડિસેમ્બરથી શરૂ થઈ ગઈ હતી. મંત્રાલયના જણાવ્યા અનુસાર, લગભગ 12 લાખ વિદ્યાર્થીઓ અને ત્રણ લાખ શિક્ષકોએ ચર્ચામાં ભાગ લેવા માટે નોંધણી કરાવી છે. આ વિદ્યાર્થીઓમાંથી એવા વિદ્યાર્થીઓની પણ પસંદગી કરવામાં આવશે, જેઓ પીએમ મોદી પાસેથી પરીક્ષા અને અભ્યાસ સંબંધિત પ્રશ્નો પૂછશે. શિક્ષણ મંત્રાલયના જણાવ્યા અનુસાર, ચર્ચા માટે આ સમય નક્કી કરવામાં આવ્યો છે કારણ કે પરીક્ષાની તારીખો નજીક આવતા વિદ્યાર્થીઓ પર અભ્યાસ કરવાનું દબાણ છે. તેમજ અભ્યાસને લઈને આ સમયે પરીક્ષા આપી રહેલા તમામ વિદ્યાર્થીઓના ઘરોમાં તંગદિલીનો માહોલ છે. આવા સમયે પીએમની આ ટિપ્સ ઘણી મહત્વની રહેશે.
