કચ્છ : વાવાઝોડું લેશે તંત્રની “કસોટી”, દરિયાઇ વિસ્તારો NDRFના હવાલે
અરબી સમુદ્રમાં સર્જાયેલું અને 35 કીમીનો વ્યાપ ધરાવતું તાઉતે વાવાઝોડુ મુંબઇમાં વિનાશ વેર્યા બાદ હવે ગુજરાત તરફ આગળ વધી રહયું છે. વાવાઝોડાના પગલે કચ્છ જિલ્લામાં તંત્ર એલર્ટ થઇ ચુકયું છે. ખાસ કરીને દરીયાકાંઠા વિસ્તારના ગામો ખાલી કરી દેવાયાં છે અને બચાવ તેમજ રાહત કામગીરી માટે NDRFની ટીમોને તૈનાત કરી દેવામાં આવી છે.
કચ્છમાં તાઉતે વાવાઝોડાની આફતને લઈને દરિયાઇ વિસ્તાર લેખાતા અબડાસા પંથકમાં તકેદારી વધારી દેવાઈ છે. પ્રાંત અધિકારી પ્રવિણસિંહ જેતાવતે ભારાવાંઢ, ભગોરીવાંઢ,મોહા ડી,જખૌ બંદર સહિતના વિસ્તારોની મુલાકાત લીધી હતી. તેમણે જણાવ્યું છે કે, હાલ અબડાસા તાલુકાના 24 ગામો ખાલી કરાવાયા છે. 2400 લોકોની વસ્તી ધરાવતું જખૌ ગામ ખાલી કરી દેવાયું છે લોકોને આશ્રયસ્થાનોમાં ખસેડવામાં આવી રહ્યા છે સ્થળાંતરિત કેન્દ્રોમાં લોકોને જમવાની સવલત આપવામાં આવી રહી છે. અબડાસા તાલુકામાં તમામ ગ્રામ પંચાયતોને સૂચના આપી હોડીગ્સ દૂર કરી લેવામાં આવ્યા છે. અબડાસા તાલુકાના જખૌ બંદર ખાતે ડેન્જર સિગ્નલ નંબર 8 લગાવી દેવાયું છે.
વહીવટીતંત્રની મદદ માટે NDRFની ટીમો બોલાવાઇ
તાઉટે વાવાઝોડાના કારણે દરિયાકાંઠા વિસ્તારોમાં 165 થી 185 કીમી પ્રતિ કલાકની ઝડપે પવન ફુંકાવાની સંભાવના રહેલી છે. મુંબઇમાં વાવાઝોડાએ વેરેલા વિનાશને જોતાં ગુજરાતના લોકોની ચિંતામાં વધારો થયો છે. દક્ષિણ ગુજરાત અને સૌરાષ્ટ્રમાં દરિયો ગાંડોતુર બની ગયો છે. અને પવનના કારણે ધુળની ડમરીઓ ઉડી રહી છે અને કાચા મકાનો ધરાશાયી થઇ રહયાં છે. આવા સંજોગોમાં
બચાવ અને રાહત કામગીરી માટે એનડીઆરએફની ટીમો બોલાવી લેવામાં આવી છે. કચ્છની વાત કરવામાં આવે તો પંજાબના લુધીયાનાથી એનડીઆરએફના આસિસ્ટન્ટ કમાન્ડર રણજીતસિંહની ટીમ માધાપર યક્ષ મંદિર ખાતે તૈનાત કરાઈ છે. તેમની સાથે નાગરિક સંરક્ષણ કેન્દ્રના જવાનો પણ જોડાયા છે.
કચ્છ જિલ્લાના અનેક ગામડાઓને ખાલી કરાવી દેવાયાં
કચ્છમાં NDRF ની બે ટીમ ફાળવાઈ છે. જેમાં એક ટીમને આજે માંડવી મોકલવામાં આવી હતી. એનડીઆરએફની ટીમો દ્વારા માંડવી તાલુકાના ગુંદીયાળી - મોઢવા ગામે સ્થળાંતરની કામગીરી કરવામાં આવી હતી. આ ગામડાઓમાં વાવાઝોડાના કારણે નુકશાન થવાની સંભાવના વધારે છે. બંદરીય વિસ્તારોમાં એનડીઆરએફની ટીમોએ કમાન સંભાળી લીધી છે.
