મોદી કેબિનેટે 5G સ્પેક્ટ્રમની હરાજીને આપી મંજૂરી, દિવાળી સુધી સેવાઓ મળી શકશે

કેન્દ્રીય કેબિનેટે દેશમાં પાંચમી પેઢીની ટેલિકોમ સેવાઓ શરૂ કરવાની દિશામાં મહત્વનો નિર્ણય લીધો છે. મોદી કેબિનેટે 5G સ્પેક્ટ્રમની હરાજીને મંજૂરી આપી દીધી છે. નિષ્ણાતોના મતે, જો બધું બરાબર રહ્યું તો આ વર્ષે દિવાળી સુધી દેશવાસીઓને 5G ટેલિકોમ સેવાઓની ભેટ મળી શકે છે. આ સેવાઓને 20 વર્ષ સુધી ચલાવવા માટે સરકાર જુલાઈના અંત સુધીમાં કુલ 72097.85 MHz સ્પેક્ટ્રમની હરાજી કરશે. બુધવારે પીએમ નરેન્દ્ર મોદીની અધ્યક્ષતામાં મળેલી કેન્દ્રીય કેબિનેટની બેઠકમાં ટેલિકોમ્યુનિકેશન વિભાગના સ્પેક્ટ્રમ હરાજી માટેના પ્રસ્તાવને મંજૂરી આપવામાં આવી હતી.

હરાજીમાં સફળ બિડર્સને દેશના જાહેર જનતા અને સાહસોને 5G ટેલિકોમ સેવાઓ પ્રદાન કરવા માટે લાઇસન્સ સ્પેક્ટ્રમ આપવામાં આવશે. અગાઉ, આર્થિક બાબતોની કેબિનેટ સમિતિ (CCEA) એ 5G સ્પેક્ટ્રમની હરાજીને મંજૂરી આપી હતી. દેશની ટેલિકોમ કંપનીઓ લાંબા સમયથી 5G સ્પેક્ટ્રમની હરાજી માટે રાહ જોઈ રહી છે. આ સાથે દેશમાં નવી ટેલિકોમ ક્રાંતિની શરૂઆત થઈ છે. ટેલિકોમ મંત્રાલય આ સપ્તાહથી રસ ધરાવતી ટેલિકોમ કંપનીઓ પાસેથી અરજીઓ આમંત્રિત કરશે. જુલાઈના અંત સુધીમાં હરાજીની પ્રક્રિયા શરૂ કરવામાં આવશે.

આ માટે સ્પેક્ટ્રમની કુલ કિંમત 5 લાખ કરોડ રૂપિયા રાખવામાં આવી છે. આ અંતર્ગત સરકાર નવ સ્પેક્ટ્રમની હરાજી કરશે. આ હરાજી 20 વર્ષ માટે રહેશે. આ હરાજીમાં ટેલિકોમ કંપનીઓ 600 થી 1800 MHz બેન્ડ અને 2100, 2300, 2500 MHz બેન્ડની હરાજી માટે અરજી કરશે. ભારત સરકારે 5G સ્પેક્ટ્રમના કોલિંગ અને વિડિયો કૉલિંગ સાથે અદ્યતન સેવાઓનું પરીક્ષણ કર્યું છે.