વડોદરા: નાગરવાડામાં અકસ્માત બાદ હિંસક અથડામણ,વાહનોમાં તોડફોડ થતા પોલીસે ટોળા સામે ગુનો નોંધ્યો

વડોદરા શહેરના નાગરવાડા વિસ્તારમાં સામાન્ય અકસ્માતમાં થયેલી બોલાચાલીએ વિશાળ સ્વરૂપ ધારણ કરી લેતા હિંસક ટોળાએ વાહનોની તોડફોડ કરીને ભારે નુકશાન પહોચાડ્યું હતું.પોલીસે બંને તરફના ટોળા વિરુદ્ધ ફરિયાદ નોંધીને ધરપકડના ચક્રો ગતિમાન કર્યા છે.

વડોદરા શહેરના કારેલીબાગ પોલીસ મથક વિસ્તારમાં નાગરવાડાના નવી ધરતી ગોળવાડમાં ગત રાત્રીના 11 વાગ્યાની આસપાસ દિલીપ મકવાણા અને તેજસ રાણા નામના બે બાઇક સવારોનો સામાન્ય અકસ્માત થયો હતો.જે અકસ્માત બાદ બંને પક્ષો સામસામે લડી રહ્યા હતા. આ દરમિયાન એક બીજાનું ઉપરાણું લેવા માટે વિસ્તારમાંથી અન્ય કેટલાક લોકો ધસી આવ્યા હતા અને અકસ્માત સ્થળે ટોળા જામી ગયા હતા.સામાન્ય અકસ્માતના કિસ્સામાં બંને પક્ષોના ટોળાએ નજીકમાં પાર્ક કરેલા વાહનોની તોડફોડ મચાવી મૂકી હતી.જ્યારે નજીકમાં રહેતા કેટલાક લોકોને ઘરમાં જઈને પણ તોડફોડ કરી હતી. ઘટનાની જાણ પોલીસને થતા કારેલીબાગ પોલીસ મથકનો કાફલો સ્થળ પર દોડી આવ્યો હતો અને સ્થિતિ નિયંત્રણમાં લેવાનો પ્રયત્ન કર્યો હતો.DCP સહિતના અધિકારીઓ સ્થળ પર દોડી આવ્યા બાદ પોલીસે વિસ્તારમાં ફૂટ પેટ્રોલિંગ શરૂ કર્યું હતું.જ્યારે જૂથ અથડામણમાં કારેલીબાગ પોલીસે ગુન્હો નોંધીને 5 જેટલા શખ્સોની રાત્રે જ ધરપકડ કરી લીધી હતી.જ્યારે અન્ય તોફાની તત્વોની ધરપકડના ચક્રો ગતિમાન કર્યા છે.