આકાશ અંબાણી રિલાયન્સ જિયોના બન્યા નવા ચેરમેન, મુકેશ અંબાણીએ ડિરેક્ટર પદેથી આપ્યું રાજીનામું

ઉદ્યોગપતિ મુકેશ અંબાણીએ રિલાયન્સ જિયોના ડિરેક્ટર પદેથી રાજીનામું આપી દીધું છે. તે જ સમયે, રિલાયન્સ જિયો ઇન્ડિયા લિમિટેડે કંપનીના બોર્ડ ઓફ ડિરેક્ટર્સના અધ્યક્ષ તરીકે નોન-એક્ઝિક્યુટિવ ડિરેક્ટર આકાશ એમ અંબાણીની નિમણૂકને મંજૂરી આપી છે. આકાશ અંબાણીની નિમણૂક 27 જૂનથી લાગુ થશે. ઉપરાંત, પંકજ મોહન પવાર 27 જૂનથી કંપનીના મેનેજિંગ ડિરેક્ટર તરીકે કાર્યભાર સંભાળશે. કંપનીના બોર્ડે નવા ચેરમેન અને એમડીની નિમણૂકને મંજૂરી આપી દીધી છે.

રિલાયન્સ ઈન્ડસ્ટ્રીઝનો પાયો ધીરુભાઈ અંબાણીએ નાખ્યો હતો. તેમનો જન્મ 28 ડિસેમ્બર 1933માં સૌરાષ્ટ્રના જૂનાગઢમાં થયો હતો. ધીરુભાઈનું આખું નામ ધીરજલાલ હીરાચંદ અંબાણી છે. જ્યારે તેમણે બિઝનેસમાં પ્રવેશ કર્યો ત્યારે તેમની પાસે કોઈ વારસાગત સંપત્તિ નહોતી. ધીરુભાઈએ 1955માં કોકિલાબેન સાથે લગ્ન કર્યા હતા. તેમના બે દીકરા મુકેશ-અનિલ અને બે દીકરી દીપ્તિ અને નીના છે. 6 જુલાઈ 2002ના રોજ ધીરુભાઈના નિધન પછી તેમની સંપત્તિની વહેંચણીમાં કોકિલાબેને મુખ્ય ભૂમિકા નિભાવી હતી.