નવી નિમણૂક પામેલા 181 આઇએએસ અધિકારીઓને ગુજરાતમાં વિકસેલી જળ સંચયનની નવી ટેકનિક અંગે તાલીમ આપવામાં આવશે. ભુંગરૂ તરીકે જાણીતી આ પધ્ધતિ અમદાવાદના કપલના દિમાગની ઉપજ છે.

આ પધ્ધતિનો સફળતાપૂર્વક ટેસ્ટ કરાયા બાદ છેલ્લા 10 વર્ષોથી તેનો ઉપયોગ કરવામાં આવી રહ્યો છે. આ પધ્ધતિને વર્લ્ડ બેન્ક ઇન્ડિયા ડેવલપમેન્ટ માર્કેટપ્લસ 2007માં ગરીબી દૂર કરવાની સૌથી નવીન પધ્ધતિ તરીકે ઓળખવામાં આવી હતી. ભુંગરૂ પધ્ધતિને યુએનનો એવોર્ડ પણ મળી ચૂક્યો છે.

આ પધ્ધતિ ખેડૂતોને બે રીતે મદદ કરે છે. ચોમાસા દરમિયાન જમીનને પાણીથી ભરાઇ જવામાં મુક્ત રાખે છે. તેમજ બીજી સિઝનમાં પૂરતા પાણીની સગવડ પૂરી પાડે છે.

ચોમાસા દરમિયાન વરસાદના પાણીનો અસંતૃપ્ત ભૂગર્ભ સ્તરમાં સંગ્રહ કરવામાં આવે છે. જ્યારે સૂકી ઋતુ હોય છે ત્યારે પાણીને ભૂગર્ભમાંથી ખેંચવામાં આવે છે. તેના કારણે ખેડૂતોને વર્ષ દરમિયાન તેમના પરિવારને ખોરાકની સલામતી મળે છે. તે સાથે જ ખેડૂતોની આવકમાં પણ વધારો થાય છે.

ભુંગરૂના 132 યુનિટના કારણે આશરે 6200 ગરીબ ખેડૂત મહિલાઓને ફાયદો થયો છે અને હવે કેન્દ્ર સરકારે 2015ની બેચના આઇએએસના અધિકારીઓને લાઇવલીહુડ એન્ડ ક્લાઇમેન્ટ ચેન્જ થીમ હેઠળ તાલીમ આપવાનું નક્કી કર્યુ છે.

ઉલ્લેખનીય છે કે ભુંગરૂ પધ્ધતિને વિશ્વસ્તરે આવકાર મળી રહ્યો છે. આ પ્રકારના પ્રોજેક્ટ ઘાના, લિબેરિયા અને થાઇલેન્ડમાં પણ શરૂ કરવામાં આવ્યા છે.